StarTalk一氣呵成版丨馮允謙重新定義EMO 稱有作品太催淚難每日演唱

相隔十年再推出大碟嘅 馮允謙（Jay Fung），呢日作客《StarTalk》接受許文軒 訪問。對於每年12月都會推出專輯，就好似一份送畀自己同樂迷嘅聖誕禮物一樣，Jay解釋當初冇特別咁去計劃，只係每次都係剛剛好喺12月推出，整整下就變成傳統。Jay指喺12月出碟有個好處，就係每次推出新碟後都會有好多follow up 活動，大家又可以聚埋一齊就好似開party咁。

馮允謙終於再推出新專輯
講到相隔多年再出大碟，Jay指當初係為咗演唱會要有多啲新歌而造一隻大碟，佢指除咗自己嘅歌外，平時佢仲會幫其他歌手寫歌，而所有工作佢都會mark晒喺電話入面嘅schedule中，Jay笑言自己每日都要睇幾次有冇新嘅update，了解自己今個星期有啲咩工作要完成，jay話雖然係好忙，但成件事好充實。
雖然製作新碟工作繁忙，不過佢就認為非常充實又開心

新碟以《EMO》命名，Jay表示因為近年身邊好多朋友都有情緒問題，而平日EMO呢個字係代表負面，所以今次佢將呢個字重新定義，亦希望以新碟撫慰大家情緒，聽歌嘅時候可以搵到一個safe place。而為咗今次大碟，Jay特別以唔同顏色嚟代表唔同情緒，訪問中佢就有解釋點解會選用呢啲顏色。
佢又指新碟希望可以略為大家嘅情緒帶來一啲歡慰

今次大碟中嘅主打歌《會再見的》，其實喺去年已經完成製作，本身諗住擺喺上年嘅專輯中，但因為marketing嘅考量，所以就擺喺今年先推出。Jay承認對呢首歌特別偏心，仲做咗6個版本出嚟，其中一個版本仲有馮爸爸嘅聲，Jay就分享佢同爸爸嘅故事，仲笑言自己完咗爸爸嘅歌手夢。
又提到其中一首歌曲先後製作6個版本

除咗同爸爸嘅故事外，Jay話每次唱《會再見的》時都會特別感動，之前開演唱會綵排時，仲一度感觸到唱唔到落去，Jay指當時有工作人員拍低咗，但就希望大家唔會放出嚟呀。而講到最催淚嘅作品，Jay表示一定係《給缺席的人唱首歌》，仲話呢啲歌唔可以日日唱呀。