羅志祥婁峻碩任選秀節目導師 與銀赫李洪基靠日文溝通

台灣舞王羅志祥同新生代人氣rap歌手婁峻碩，近期齊齊加入男團選秀節目擔任導師，呢個節目係由台灣同韓國合作，所以參賽學員水準頗高，婁峻碩話知道好多學員對rap有興趣，所以會特別留意呢方面，而小豬就話見到好多學員舞技精湛，就算跳得一般，只要努力都會有好大進步空間。

婁峻碩同羅志祥成男團選秀節目導師。佢哋話以日文嚟同節目中嘅韓國導師溝通。

既然節目有韓國學員參與，當然都有韓國導師啦，包括Super Junior嘅銀赫、FTISLAND嘅李洪基等，都會親身指導學員，而Super Junior嘅隊長利特仲會擔任節目MC。齋睇陣容已經好鼎盛，不過小豬就自爆，兩地導師喺溝通方面似乎有小小障礙，事關佢同婁峻碩都唔識講韓文，不過對上一次錄影大家就打破咗隔膜，因為小豬發現韓國導師們同佢一樣識講日文，於是大家就用日文傾偈傾得好開心啦！

小豬話見到好多學員都係舞技精湛。

講到台灣近年掀起一股合體熱潮，包括5566、Energy同棒棒堂等昔日男團都陸續合體，引起唔少話題、本身都係男團四大天王出身嘅小豬就話，因為成員中有兩位已經轉行，所以合體有一定程度困難，如果係佢同歐漢聲組成嘅「羅密歐」，可能性就高好多啦！不過佢都有坦言，自己同歐弟私底下已經冇聯絡，再加上歐弟日前喺錄影節目嗰陣又重提，當年女友Makiyo被好兄弟小豬搶走嘅陳年恩怨，睇怕呢對昔日好友要合體，機率都好低啦！