石修參加歌唱比賽拎過冠軍 米雪專注演戲自嘲「唔係嗰瓣唔好阻住大家」

石修及米雪日前喺馬來西亞一個歌唱大賽擔任評審，二人突然現身，令現場觀眾即時起哄，一眾參賽者大感驚喜。

石修及米雪日前喺馬來西亞一個歌唱大賽擔任評審。
石修及米雪均表示喜歡唱歌及跳舞，眾所周知石修玩咗多年色士風，原來佢亦喜歡唱歌，既可抒發情緒，又可減壓、娛己娛人，多年前曾參加過歌唱比賽更贏得冠軍，參加過李後主歌唱比賽唱《破陣子》得第一名，除此之外，石修雖然平時冇唱K，不過佢有幾首飲歌《李香蘭》、《喜歡你》、《海闊天空》、《Hotel California》、《I don’t want to talk about it》。

石修及米雪均表示喜歡唱歌及跳舞，眾所周知石修玩咗多年色士風，原來佢亦喜歡唱歌。
米雪專注演戲拒參加歌唱比賽，佢笑言：「知道自己唔係呢瓣，你出去比賽，一定有人唱得好過你，咁就唔好阻住大家啦，畀啲心機做戲好過啦。」原來米雪一直有跟老師學唱歌：「唱歌係因為有陣時要出去做宣傳或者登台演出，呢個係滿足嘅、自己都開心嘅。一直都有跟老師練唱歌，一定要練住咁把聲先至可以越唱越好，唔會停留喺原地。」

米雪專注演戲拒參加歌唱比賽，佢笑言：「知道自己唔係呢瓣，你出去比賽，一定有人唱得好過你。」
呢次二人擔任歌唱比賽評審，米雪認為最重要係參賽者有冇努力、用心及練歌，「呢啲係聽到、睇到，一定要用工，再加埋喺台上嘅表演、現場嘅對答，我覺得聲、色、藝呢幾樣係好緊要」。

米雪認為最重要係參賽者有冇努力、用心及練歌。
作為音樂人嘅石修則更加嚴謹：「注意參賽者嘅選曲，大家熟識嘅，能得到評判共鳴，自己能駕馭嘅，能盡量發揮，出錯機會少；衣著要配合首歌，唔可以錯配，七彩繽紛亂咁配搭會扣分。因唱歌配搭衣著係showmanship ，不可分割。其餘就係音準、音域、音質、節拍、delivery能力、感情、肢體語言、對歌曲歌詞了解、風格及唱出嚟嘅味道。」石修對其中一位參賽者印象特別深刻，「有一位唱《夜上海》嘅女參賽者，完全唱出歌曲嘅描寫，將紙醉金迷、夜夜笙歌、奢侈浮華嘅意境，用歌聲發揮得淋漓盡致」。