44歲方力申未婚令阿媽未感滿足 讚女友葉萱視為結婚對象

方力申（小方）與葉萱（Maple）自去年公開認愛後，二人戀情非常低調，甚少同場露面，方力申早前喺佛山開個唱，難得女友驚喜現身支持，佢近日受訪時坦言拍拖至今，依未能獲得女友嘅信任，方力申自嘲過去「底太花」，需要時間讓女友了解八卦雜誌以外嘅自己，而方力申最近接受香港電台訪問時，亦有分享與女友嘅相處點滴，佢再次表明每次拍拖都視女友為結婚對象。

方力申坦言阿媽未感滿足，皆因想阿仔快啲成家立室。
當主持問到新戀情有冇令方媽媽好開心，方力申坦言阿媽未感滿足，皆因想阿仔快啲成家立室：「因為我仲未結婚，弟弟亦未婚。拍拖唔代表會結婚， 抱孫先會（令佢）心滿意足。我40幾歲已過咗適婚年齡，仲參加咗耆英游泳比賽哩！一切順其自然吧。」方力申又指拍拖好低調，希望慢慢去經營，互相了解同溝通。

44歲方力申參與四屆奧運主持與採訪工作，今年為TVB巴黎奧運節目擔任特派專員採訪運動員，成熟採訪手法獲網民大讚。
方力申稱女友係一個簡單嘅女仔，佢記得年初去歐洲旅行，去咗英國同法國，帶咗3個行李箱，其中一個空箱本來係預留作購物之用，結果咩都冇買。方力申同女友嗰次喺倫敦同巴黎參觀咗11間博物館，冇去過一間名店或百貨公司，方力申續道：「佢完全唔愛呢啲。其實我係有少少喜歡，但佢唔鍾意我就唔去。佢愛畫畫，去到巴黎鐵塔同凱旋門就想畫畫，我就喺佢身旁玩電話等。 我哋邊行邊食，唔需要特別預訂餐廳。佢就係咁簡單。」

方力申去年初公開與葉萱戀情，二人感情穩定但甚少放閃。 
方力申入行超過20年，對於外界認為娛樂圈係大染缸，方力申反指圈中人好多好單純，甚至連基本嘅人情世故都唔懂，「因為我哋工作完畢就各自離開，冇經歷過咩辦公室政治，亦唔知道有咩是非，所有事都係由其他人幫忙處理。至於每次拍戲都會有花邊新聞，其他行業都有辦公室戀情啦，公眾人物係好重視人格，呢啲係我哋本錢。爸爸話男仔膽小啲比較好，因為唔敢做太多壞事。」

方力申早前喺佛山開個唱，難得女友驚喜現身支持。
被問係咪因膽小而未敢向女友求婚，方力申回應：「唔係我今日向佢求婚，佢就會答應。 我相信拍拖嘅男女（對於婚姻）都會有默契。（對方是否理想太太？）我每次拍拖都認為對方係結婚對象。」 疫情期間方力申嘅工作量驟減，一度令佢懷疑自己嘅能力，幸好方力申有機會演出舞台劇令自己恢復自信，肯定自己演員嘅身分，「其實自去年 11 月完成舞台劇至今，我還沒有機會拍戲」。

方力申表明每次拍拖都視女友為結婚對象。
方力申指當時女友反而叫佢唔使咁辛苦賺錢，多賺錢都係冇咩用，「佢係一個好簡單嘅人，我向佢解釋事業對於男人而言係好重要，能帶嚟自信同安全感，而非只為金錢。我要做一個有成績嘅人；我同女友經常傾偈，好多男人唔鍾意聊天，但女人喜歡，所以我都會同佢談天說地， 確實有所得著嘅！」