黃庭鋒飽受時差困擾 陳懿德歌喉獲讚添自信

奧運雖然已經完結，不過運動熱潮就仍然未減退，呢日黃庭鋒、陳懿德就同奧運香港體操代表石偉雄以及滑浪風帆代表馬君正齊齊出席分享會，庭鋒同德德之前有份主持今屆奧運，二人嘅表現仲唔錯，不過庭鋒就有嚴重嘅奧運後遺症，就係佢嘅時差問題依然困擾佢，庭鋒話已經試過用打機，睇下可唔可以調節到，結果好番少少，佢又飛咗去加拿大，搞到再一次面對時差問題，真係沒完沒了呀。

黃庭鋒、陳懿德。滑浪風帆代表馬君正、奧運香港體操代表石偉雄、黃庭鋒及陳懿德。

至於德德就話奧運過後，工作機會都多咗，日前佢更受邀喺一個活動上唱歌，令本身已經有歌手夢嘅德德，終於可以發揮所長，佢話估唔到當晚演繹完《情非得已》後，外界嘅反應都非常好，令佢自信心都大增，仲提議可以同庭鋒嚟個合唱添。德德仲自爆當年曾經報名參加《聲夢傳奇》，但可惜好快止步，未能去到面試階段，至於《中年好聲音》佢就話自己仲未合資格參加，不過，宜架有機會登下台，唱下歌都幾開心呀。
陳懿德