張家朗未知會否出戰下屆奧運 自認性格內斂盼大家畀多啲私人空間

劍神張家朗自從喺巴黎奧運再度奪金，一舉一動被大家關注，呢日佢現身一個時尚品牌活動，佢就話好感激大家支持，有時喺街上見到唔少市民，聽到恭喜嘅聲音，甚至上前邀合照，家朗都覺得係開心事，亦希望大家給予多啲私人空間，坦言自己性格內斂，有時會唔太習慣。

張家朗呢日出席時裝品牌活動。

家朗嘅劍神之路並唔易行，佢好感謝教練及家人一直以嚟嘅支持，被問兩度奪奧運金牌，下一屆仲會唔會參加奧運，家朗直言4年之後嘅事，首先要睇返自己身體狀態，又要睇吓排名方面，每次出戰奧運之前都要先爭分，到時再睇自己身體狀態作決定。
張家朗話自己性格內斂，希望大家畀多啲私人空間。
對於政府未來想建一個劍擊館，家朗表示支持擬添劍擊館，覺得係一件好開心嘅事，皆因現時本地劍擊比賽場地都係用唔同嘅室內體育館去改建而成。