有片！劉德華深圳站巡唱險跌落台 狂收生日祝福感激粉絲厚愛

劉德華世界巡迴演唱會嘅36場內地巡演日前正式圓滿結束，雖然喺最後一站深圳站展開前一日遇上10年嚟最強颱風「魔羯」來襲，仍然無阻一眾粉絲嘅熱情，風雨不改如期赴約，而華仔呢次喺內地巡演亦小意外頻生。呢次喺深圳站開唱，唱到《男人哭吧不是罪》一曲時，華仔突然喺舞台踩空摔倒，幾乎成個人跌落舞台空洞，嚇到觀眾鼻哥窿都冇肉。

劉德華世界巡迴演唱會嘅36場內地巡演日前正式圓滿結束。

好在華仔身手靈敏，喺跌倒時迅速扶住台邊，身體先冇跌落黑洞。事後華仔立刻平息大家憂慮叫大家放心：「我答應大家安安全全、健健康康，現在我手指受傷，不好意思，以後不會。我答應大家以後不會。」相信大家聽完華仔咁講，個心都可以定啲！ 喺呢36場巡唱中，華仔最感激就係歌迷對佢講出無數次愛，加上9月係華仔生日月，所以粉絲們紛紛向偶像大叫「生日快樂」等祝福，華仔亦感謝大家對佢嘅厚愛，令佢收到一份最好嘅禮物。 

華仔突然喺舞台踩空摔倒，幾乎成個人跌落舞台空洞，嚇到觀眾鼻哥窿都冇肉。

華仔傾盡全力演出，令觀眾非常享受。

至於華仔有份監製兼主演嘅電影《危機航線》亦官宣10月10號喺香港上映嘅好消息，電影講述一架超豪華客機喺國際首航途中遭劫機，華仔飾演嘅國際保安專家高皓軍挺身而出同一眾劫匪周旋。而內地新生代小花張子楓就飾演華仔女兒小軍，兩父女聯手對抗由屈楚蕭飾演嘅劫機大反派Mike。 首支預告片中，喺機艙內嘅華仔同屈楚蕭鬥智鬥勇，持槍對峙、近身搏鬥、以致引擎爆炸等震撼眼球，單睇預告已經覺得緊張刺激！同戲演員仲有劉濤、郭曉東、蔣夢婕等，演員陣容非常強大。

華仔有份監製兼主演嘅電影《危機航線》亦官宣10月10號喺香港上映嘅好消息。