陳蕊蕊婚後唔急住生小朋友 與老公各自發展事業

亞洲電音女神DJ Mao及藝人陳蕊蕊噚日喺旺角出席「螢跑2024．香港站暨IM螢光音樂節」記者會，DJ Mao以性感打扮上陣，陳蕊蕊今次以活動協辦方出席。

陳蕊蕊指呢兩年暫時唔生小朋友住。
陳蕊蕊於2023年與圈外男友Eric Chan，二人結婚大半年，佢早已習慣人妻身份，不過陳蕊蕊婚後未有急住生B，佢指呢兩年暫時唔生小朋友住，想做好自己嘅事業先，陳蕊蕊目前將事業重心放喺內地，以拍攝劇集為主，而陳蕊蕊一向瓣數多，佢透露將投資6位數推出生酮食品生意。 

DJ Mao以性感打扮上陣。
被問會唔會減少幕前工作，陳蕊蕊表示：「平衡返兩邊囉,唔會完全離開幕前嘅。」至於同老公各自發展事業，蕊蕊並冇干涉對方工作：「其實佢有佢，我有我呀，我做啲嘢佢唔會理。」
DJ Mao就以流利普通話表示：「我非常興奮和期待，適逢音樂節是萬聖節前夕，我正構思當天的特別造型。」問到會唔會與粉絲一齊落場跑，DJ Mao就話：「其實我讀書時運動經常第一名啊！」 DJ Mao稱非常喜歡香港地道小食，更特意到訪旺角品嚐奶茶，佢都歡迎大家邀請佢品嚐更多本地美食。

「螢跑2024．香港站暨IM螢光音樂節」記者會。
是次活動賽道途經維港，又設多款比賽，適合不同年齡及程度人士參與，同時亦有設萬聖節嘉年華，具豐富美食及遊戲攤位，而音樂會有國際級DJ加持，多位世界各地的DJ輪流演出，DJ Mao更會壓軸登場。