吳謹言肚凸凸孕味濃曝光 老闆于正祝福雙喜臨門露玄機

宮鬥劇《延禧攻略》嘅「魏瓔珞」吳謹言今日與劇中「親王弘晝」洪堯官宣喜訊，兩人正式領證結婚，現年34歲吳謹言嫁32歲洪堯，雖然女方比男方年長兩歲，但二人戀情亦順利開花結果，喜訊公開後令大批網民感到震驚，亦收到唔少好友祝福，火速登上內地熱搜之位。

34歲吳謹言嫁32歲洪堯，雖然女方比男方年長兩歲，但二人戀情亦順利開花結果。
同時令人熱議關注嘅係吳謹言無預警急於結婚，盛傳佢有咗身孕，網上流傳一條粉絲拍攝片段，見吳謹言一身簡便T恤配短褲，明顯肚凸凸，而且行路姿勢腰板挺直就住就住，十足十孕婦一樣，上車期間更小心翼翼，雖然疑似陀B，但吳謹言對鏡頭並無避忌，邊行邊向粉絲對望打招呼，上車坐定定後仲揮揮手先離開。

吳謹言一身簡便T恤配短褲，明顯肚凸凸。
兩人宣報婚訊後，老闆兼老友于正亦大方喺社交平台送上祝福「良辰吉日，雙喜臨門，大吉大利，見者隨喜@吳謹言@洪堯」，令吳謹言懷孕嘅喜訊甚囂塵上。其實早喺去年已經有媒體爆出吳謹言有意懷孕嘅消息，如今好可能願望成真。

老闆兼老友于正亦大方喺社交平台送上祝福「良辰吉日，雙喜臨門，大吉大利，見者隨喜@吳謹言@洪堯」。
另外有聲稱見證吳謹言同洪堯領證嘅好友喺網上發布近照，見一對新人以白色情侶裝高舉結婚證，吳謹言一身腹部鬆身嘅白色裙刻意掩蓋孕味，老公洪堯恩愛攬住老婆小腹，夫妻一臉甜蜜滿瀉。

吳謹言一身腹部鬆身嘅白色裙刻意掩蓋孕味，老公洪堯恩愛攬住老婆小腹。