農夫任林峯澳門個唱嘉賓夾攻叫台上換褲惹歌迷起哄 拒唱「峯之情歌」笑言唔想玷污

林峯澳門演唱會搵嘉賓花盡心思，佢上星期分別搵咗好兄弟吳卓羲同「女朋友」佘詩曼上台獻唱，噚晚嗰場演唱會就搵嚟農夫做嘉賓，阿峯出場時問農夫知唔知呢日嘅任務係乜，C君續道：「係畀個位你去…」阿峯笑言：「係！幫我攝時間，因為我需要換衫時間，第一場搵吳卓羲幫我講5分鐘嘢。」C君搞笑稱諗住講埋餘下嗰50分鐘。

林峯澳門演唱會花盡心思搵嘉賓。
阿峯解釋搵農夫做嘉賓係因第一個演唱會已經有佢哋助陣，又講過以後嘅演唱會都搵農夫做嘉賓嘅原因，C君稱有咩偶像就有咩粉絲，阿峯對人好好，佢嘅粉絲都好好，阿峯啲粉絲之前係有去睇農夫演唱會。見現場粉絲即時大叫，C君笑言：「你哋唔好扮嘢啦，有咁多人睇，我哋啲飛就唔會賣剩。」陸永指係有兩、三個有去農夫演唱會捧場，買埋周邊商品，喺農夫演唱會舉起「林峯」嘅燈牌，農夫亦預告將喺11月再開騷。

阿峯解釋搵農夫做嘉賓係因第一個演唱會已經有佢哋助陣，又講過以後嘅演唱會都搵農夫做嘉賓嘅原因。
阿峯笑言有擔心被農夫佔用太多時間嚟講棟篤笑，阿峯落台前千叮萬囑叫農夫睇住時間，又指自己換歌衫唔需要太耐，C君即叫阿峯即場喺台上換歌衫，令阿峯歌迷立即尖叫，陸永接住講大家都好斯文，唔會叫阿峯「除褲」，只會大嗌「換褲」，阿峯不敵農夫夾攻，只好笑住話交個台畀農夫，又指下次喺台上換衫要提早同場地申請。

阿峯笑言有擔心被農夫佔用太多時間嚟講棟篤笑，阿峯落台前千叮萬囑叫農夫睇住時間，又指自己換歌衫唔需要太耐。
C君指而家全城都愛林峯，因為阿峯好好打，喺《九龍城寨之圍城》打贏咗伍允龍，而伍允龍喺戲中打贏咗古天樂同洪金寶，C君表示阿峯而家將大哥大同古生都唔放喺眼內，C君又指今次阿峯係有個任務想農夫完成，笑指本來係要求佢哋唱阿峯啲歌，C君續言：「阿峯問我哋可唔可以嚟佢個場認認真真唱一首佢嘅歌，我哋即時拒絕咗，因為佢補多咗一句，只要你哋認認真真唱我嘅歌就會好好笑，我係冇見過人搵演唱會嘉賓係出嚟畀人笑。好特別！」

C君同陸永笑指本來係要求唱阿峯啲歌，但係佢哋係唔會玷污阿峯啲歌。
C君同陸永喺台上chitchat，先話自己唔係「唱情歌的人」，又話「明天以後」就要唱等等，二人以阿峯啲歌名大玩食字，佢哋笑指本來係要求唱阿峯啲歌，但係佢哋係唔會玷污阿峯啲歌，所以佢哋帶咗自己嘅新歌嚟唱。