林峯宣布明年五月紅館開騷 預告好兄弟胡子彤將闖樂壇

正喺澳門舉行緊演唱會嘅 林峯 ，前晚第三場請嚟農夫擔任嘉賓，而第四場就請嚟「十二少」 胡子彤 。農夫同林峯一直甚有淵源，話說農夫多年前出席頒獎禮，喺後台已聽到全場人不停大叫「農夫」，當出場先知表錯情，原來台下全部都係「林峯」燈牌，兩者發音相似就此結下不解緣，林峯仲揚言以後開Show都會請農夫到場見證，認真重情重義！

正喺澳門開騷林峯宣佈明年5月將再登上紅館舞台
第四場，林峯喺台上正式宣布，已落實明年五月紅館檔期，全場立即瘋狂尖叫。對於每場均有歌迷要求佢除衫，阿峯就講笑話：「仲有半年時間俾我操，到時先至叫我除衫都未遲！死喇！自己俾個氹自己踩。」
又預告會努力排練到時騷肌演出

之後「十二少」胡子彤同阿峯一齊合唱《馴獸師之王》。唱完後，兩人齊齊戴上《九龍城寨之圍城》中嘅糖果眼罩，阿峯話：「喺九龍城寨你送咗個聖誕老人面具俾我，我而家送個糖果眼罩俾你。」胡子彤最近喺馬來西亞拍戲，煞科後即刻趕抵澳門，雖然張文傑、劉俊謙亦各有各忙，但「城寨四少」確實建立出真感情，阿峯透露四人有個通訊群組，Group名更叫「城寨殘兵」！
呢晚任嘉賓嘅城寨四少成員胡子彤亦將殺入樂壇

胡子彤一向係唱得之人，林峯更忽然爆料，預告子彤將會加入樂壇，接着子彤即繼續大展歌喉，獨唱《風的形狀》，獲得熱烈掌聲，為他發展歌唱事業打下一支強心針。
呢日周秀娜亦都有現場欣賞阿峯嘅演出

林峯呢晚亦進行點唱環節，特別選唱Side Track 作品《反話》，唱完即讚歌迷好勁可以唱晒全首，笑指連自己同唱錯咗三句歌詞。當晚周秀娜也是座上客，趁完場更到後台同阿峯合照，娜姐形容林峯跳舞好「騷」，大讚佢舞台上勁歌熱舞充滿魅力！