《愛．回家》劇組小休後重聚慶中秋 張景淳獨遊日本被呂慧儀質問

中秋節呢個人月兩團圓嘅日子，當然唔少得《愛．回家之開心速遞》劇組同大家一齊慶祝啦！劇組早前因為存貨充足暫時停廠，台前幕後享受完兩個星期嘅假期，呢日各位叉足電出席宣傳活動。其中袁文傑更趁劇組放假入院做手術，佢話膝頭因長期受舊患困擾，對日常生活造成不便，手術後情況改善，不過醫生都有警告佢話唔可以再做劇烈運動。

袁文傑早前趁休假入院處理舊患
張景淳就趁難得嘅假期去咗日本旅行，劇中老婆兼現實中嘅緋聞女友呂慧儀就話，好好奇景淳一支公去日本八日，究竟做咗啲乜嘢？景淳就話自己係宅男一名，所以去嘅地方都係宅男出沒區，好似秋葉原、玩具舖，仲去埋動漫《男兒當入樽》當中嘅著名景點打卡添。
張景淳嘅日本之旅就大受呂慧儀懷疑喇

2024年香港小姐啱啱出爐，冠軍倪樂琳就被指同劇中飾演Rebecca嘅沈可欣撞樣，沈可欣就話倪樂琳後生又靚女，多謝大家對自己嘅抬舉。
被指同應屆港姐倪樂琳似樣嘅沈可欣，指係網友對自己太抬舉

9月18號係古佩玲25歲生日，哥哥仲特登帶埋一家人來港陪佢慶祝，不過佢就投訴緋聞男友陳浚霆冇任何表示喎。

好快踏入25歲嘅古佩玲，指陳浚霆毫無表示