星二代快樂簡單度佳節 陳凱琳胞弟返港過中秋

中秋節最重要當然係一家人相聚團圓喇，已移民嘅陳凱琳細佬Derek，亦都同太太由加拿大返港同家人團聚，Grace亦喺社交平台上載咗合照，見Grace好珍惜同細佬相處嘅時間，兩人唔單止去玩攀石，亦一齊去打邊爐，Derek亦同姨甥仔打成一片，仲去接佢哋放學添，一家人樂也融融，不過，咁多張照片，就唯獨唔見Grace老公鄭嘉穎，唔通佢做咗鏡頭後嘅攝影師？

陳凱琳已移民嘅細佬近日返港，同家人共度中秋
而 古巨基 陳山聰 同鄭俊弘 三位老竇，中秋節亦暫時放低工作，陪佢哋家中少爺玩燈籠，基仔嘅囝囝Kuson，仲好型咁踩住單車，攞住燈籠去賞月，Kuson仔仲同大家講：「Hello大家好，中秋節快樂，呢個(燈籠)我造架，靚唔靚呀？Love you﹗」可愛指數爆晒燈。
Kuson就向大家展示自己叻仔整嘅燈籠

至於山聰就帶囝囝Jaco去自己兒時過中秋嘅公園玩，山聰仲話：「回想起小學時間我就係呢個公園仔過咗人生童年嘅中秋，估唔到今日帶住自己嘅小朋友嚟一齊玩，一樣係咁開心，中秋節快樂﹗」而Fred同太太 何雁詩 亦帶住囝囝感受中秋節氣氛，相中所見Asher表現興奮，更騎係爸爸嘅膊頭四處張望燈籠。
靚媽阿Lynn熊黛林亦上載咗一家四口過中秋嘅溫馨照，一對孖女更好開心品嚐扑扑蛋糕月餅，又食又玩呢個中秋相信一定過得好開心呀。

而山聰就帶Jaco返兒時中秋玩樂嘅公園感受喇