崔治源襲港出席活動成焦點 劉嘉玲嘆一身飛債難處理

劉嘉玲 吳君如 陳可辛 同 何超瓊 等人一齊出席一個慈善晚宴，同場嘅貴賓仲有韓星 崔始源 ，Oppa非常親民，唔單止走近Fans堆自拍，更同何超瓊同埋久未喺公開場合露面嘅何超盈合照。

劉嘉玲同黃子華嘅舞台劇一票難求，令佢非常頸痛
嘉玲姐主演嘅舞台劇日前開售門票即被秒殺，佢都話身邊好多人託自己買飛，就連移民多年嘅訓練班老師、醫生律師各行各業都打比佢，搞到佢都話只能夠盡力。問到佢有無打算加場? 佢就話暫時無呢個打算，如果真係要再加，可能要等佢休息後再考慮。

嘉玲又話見大家反應咁好，自己嘅心情係又開心又大壓力又緊張，好刺激嘅感覺。為咗令演出狀態更好，嘉玲姐日常飲食已經變得好清淡，佢亦為演出作準備，因為今次對白係有啲難度，所以呢段時間佢已經要做資料搜集，同埋形體上嘅訓練，就好似跳舞等令身體更靈活。
何超瓊、韓星崔如源都係呢晚嘉賓

佢仲話唔駛老公梁朝偉相伴，只需要精神上支持佢就可以，而偉仔有時間都會到場欣賞，佢仲爆老公好擔心佢忘詞同走神，不過嘉玲就大派定心丸，話自己做舞台劇嘅經驗比偉仔更多。

君如呢晚著住陳可辛喺紐約空運到港嘅靚裙出席，更應要求喺鏡頭前轉身影相，由於條裙透視太性感，所以君如都話有啲怕醜同擔心，佢仲話呢晚見到始源真係好開心，事關之前曾經想邀對方拍戲，不過因為檔期未能成事。
君如身穿陳可辛訂購嘅靚衫現身活動

君如下月初將獲頒《夏威夷國際電影節》聚焦香港影人獎，表揚佢對影壇貢獻同傑出成就，君如話收到消息時好激動同好感恩，君如話陳可辛都想去當地支持佢，可惜訂唔到機票，所以講笑話要包架私人飛機去支持君如。

君如幾乎有機會同崔始源合作，可惜因為檔期而未能成事