黃劍文等足八年終於開騷 期望成功邀請周慧敏做嘉賓

中聲歌手黃劍文（Kimman）近排工作不斷，完成音樂劇冇耐又要籌備開騷，等足八年終於可以開個人騷，Kimman嘅姨媽、表姐，表弟都特登現身發布會撐場，令Kimman都話收到消息後感到夢幻又激動又難以置信。對於開騷準備，Kimman就話會多做運動跑步鍛鍊同埋舉重，亦會戒口保養把聲。

等足八年，黃劍文終於可以開個人騷。
Kimman嘅愛貓Omega呢次都係演唱會海報一位小主角，不過以嘉賓身份嚟發布會嘅Omega可能因為人太多而有啲怕醜。至於真正嘉賓就係譚輝智呢位戰友喇！Kimman笑言想跳舞，但未知輝智有冇時間練舞，但自己一直欣賞輝智歌聲，亦開心請到輝智做嘉賓。

Kimman嘅愛貓Omega都有出席。 
雖然係第一次開個人騷，但Kimman演出經驗豐富，特別係佢擔任周慧敏（阿V）巡迴演唱會固定嘉賓。Kimman透露自己已問咗阿V有冇時間可以嚟做嘉賓，加上阿V之前宣布自己最後一次做巡唱，所以Kimman都話每次同阿V 唱歌都百感不捨。
黃劍文期望可以請到周慧敏做嘉賓。