拉姑車婉婉讚顏米羔炮製特飲畀滿分譚輝智：希望可以健康咁離開

甘永傑、顏米羔、梁浩賢、梁思傑及劉威煌等噚晚喺網上開直播整嘢食《輕鬆煮》，第一次公開顯露佢哋嘅廚藝，仲有重量級嘉賓拉姑狄波拉、車婉婉、鬍鬚Kong及譚輝智品嚐美食，米羔炮製特飲、威煌整茶碗蒸、思傑煮黯然銷魂飯、浩賢整前菜、甘仔煲椰子雞湯等。

拉姑狄波拉、車婉婉、鬍鬚Kong及譚輝智品嚐美食。
輝智坐低嗰陣就話好緊張：「希望可以健康咁離開。我見到甘永傑個樣好無奈，好似睇緊說明書咁，好似第一次下廚。」身邊嘅車婉婉聞言即話：「啋！」拉姑就指睇佢哋啲手勢係得嘅，FC笑指：「熟得啦！唔使好食！冇咩期望。」

甘永傑、顏米羔、梁浩賢、梁思傑及劉威煌等噚晚喺網上開直播整嘢食。
車婉婉一向係煮得之人，佢都有巡視吓廚房，睇吓大家整成點，而拉姑亦有睇吓佢哋嘅廚藝，稱自己係嚟偷師，拉姑笑稱：「唔行過嚟好哋哋！行咗過嚟覺得唔夠食。」之不過拉姑行前聞一聞，又覺得嘢食調味好香，仲忍唔住試食。而車婉婉同拉姑就好欣賞米羔整嘅特飲，大讚好好飲，仲畀咗滿分10分添！