歡樂滿東華2024籌款再創佳績 輝智忠粉拉姑豪捐100萬行善

歷時6小時嘅大型籌款節目《歡樂滿東華2024》星期六晚圓滿舉行，最終籌得善款1億3千8百8十8萬8千8百8十8元再創佳績，打破去年紀錄真係可喜可賀。
阿姐汪明荃以一曲《Make My Day》打頭陣出場，籌得60萬元，而佢同羅家英演出嘅折子戲《荊釵記》更籌得381萬1千元。除此之外，「明荃之友會」亦合力摺銀紙花擺設籌款。

阿姐歌迷繼續捐出銀紙擺設籌善款
胡定欣同黎耀祥呢對巾幗CP就合唱《紅蝴蝶》籌款，演出完兩位都話輕鬆唔少，講到兩位對奪視帝視后有無信心？祥仔就好謙虛表示無信心，但佢就話對定欣好有信心，仲話好多高難度嘅角色，只有定欣先做得好。而定欣就話好希望祥仔可以再攞視帝，仲話對拍檔相當有信心。
巾幗CP祥哥同定欣合唱行善

而多年嚟為籌款節目出心出力嘅薛家燕，呢次就邀請到譚耀文一齊表演歌舞，真係令觀眾好有新鮮感。不過由於阿譚正喺深圳拍劇，所以綵排時間唔多，但呢晚佢嘅表演一樣咁精彩。
譚耀文罕有現身同家燕姐合作演出

中聲2嘅譚輝智、劉威煌就同黃劍文一齊合唱《朋友》，輝智嘅頭號忠實Fans狄波拉，呢晚亦有同老公鬍鬚Kong一齊現身，佢更相當豪氣捐出100萬做善事。而曾比特呢晚就同東華主席鄧明慧一齊合唱《源遠的歌》，阿Mike仲大讚主席認真又好有要求，真係相當敬業。
FC、隊長同Kimman合作演出

拉始豪捐百萬支持FC同東華嘅服務

至於關禮傑就聯同朱晨麗、伍富橋、許家傑、梁敏巧仲有楊梓瑤一齊表演歌舞，首次同傑哥合作嘅朱朱，就話兩人好有默契。而鍾柔美、冼靖峰同埋只得8歲嘅小妹妹吳欣彤就一齊載歌載舞，佢哋都大讚小妹妹表現得好出色，當Archie話自己有啲甩漏時，小妹妹即刻大讚Archie跳得好好，搞到Archie甜到入心呀。
8歲嘅吳欣彤同Yumi、Archie演出勁歌熱舞

區瑞強呢晚就夥拍妹妹區桂芬一齊合唱《問》，兩兄妹合作溫情洋溢。而阮浩棕呢晚就挑戰揈水髮，為籌款出盡全力。

阮浩棕呢晚就表演揈水髮