中年好聲音3丨大灣區選手水準急跌激嬲肥媽 巫啟賢重臨任嘉賓評判

睇到肥媽咁肉緊咁鼓勵一眾大灣區選手，就知佢對大家幾上心啦！事緣係《中年好聲音3》大灣區嘅選手，喺綵排時因為唔夠信心搞到聲都震埋，表現大失肥媽期望，令佢忍唔住要同大家訓話呀！
睇相都feel到肥媽有幾勞氣。
肥媽話選手們嘅水準嚟到現場跌咗3、4成，有啲人仲因為緊張而成身震，甚至仲震到走晒音，所以肥媽先會激勵大家。

黃文韜嘅家人特登嚟到現場支持。

嚟緊22號播出嘅《中年好聲音3之決戰大灣區》，其中10位大灣區選手將會上場，當中包括參加過《亞洲星光大道》嘅黃文韜，面對熟口熟面嘅評審，佢反而覺得壓力大，覺得有種唔可以衰嘅感覺，但當見到一班親友拉大隊嚟到現場支持，就令到佢覺得好窩心喇！
高菲因為把聲太似女生，所以會畀誤會。
海選時因為把聲似女仔嘅男性參賽者高菲，就接納評審們嘅建議以女歌手嘅歌出戰，佢又指今次出戰歌係想送畀家人同朋友。而作為前兩季《中聲》鐵粉嘅梁文君，除咗熟讀節目內容外，平日有幫開網紅同唱片公司唱Demo嘅佢，唱功都有返咁上下，佢呢次就揀咗譚輝智嘅一首出戰歌嚟展示自己嘅唱功。
梁文君係《中年好聲音》系列嘅鐵粉。
另外，節目請嚟巫啟賢幫手揀出大灣區12強，問到佢今次係會長駐定係做嘉賓評判？佢就笑言要問下曾志偉有幾多budget，而肥媽就話希望巫啟賢可以長駐，因為同對方合作好開心呀。
肥媽希希巫啟賢可以長駐做評審。