中年好聲音3丨大灣區最強選手齊登場 巫啟賢親教以律動助唱歌

今個星期日（29號）播出嘅《中年好聲音3 之 決戰大灣區》，餘下嘅10位選手將會出場爭奪12強席位，呢日中2生尹新杰都有嚟到現場觀戰，因為有佢嘅老友杜閱出賽。

尹新杰呢日都有嚟觀戰。尹新杰同杜閱係朋友。
杜閱話自己係因為睇到尹新杰發嘅朋友圈而知道《中年好聲音3》嘅賽事，如果唔係睇到自己都唔會參加，佢又指喺呢次比賽入面，尹新杰畀咗好多鼓勵自己。尹新杰指平日會成班朋友一齊唱K，而杜閱就係其中一員，所以亦因為咁知道對方鍾意唱歌。

巫啟賢呢日教官上，教林立峰點透過身體嘅律動去唱歌。

身為評判嘅巫啟賢，呢日就教官上身親自教林立峰點樣透過身體嘅律動去唱歌，期間身為主持嘅車婉婉仲睇唔過眼要出手去搖晃林立峰，婉婉最後仲因為肉緊得滯，拍對方後背拍得勁大聲。
車婉婉因為肉緊得滯，大大力咁拍咗落林立峰背脊。
有留意預告嘅觀眾，就知道有唔少被周國豐評為大灣區最好表現嘅選手會喺呢集出現，當中唔少選手都有直播唱歌嘅經驗，好似海選時就已經畀人話把聲似陳慧琳嘅陳嘉琦，原來佢喺2005年曾經參加過內地選秀節目，名次仲要唔錯㗎。另外一位職業直播主兼駐場歌手嘅潘紹麟，就話自己係憑住多年嘅自學經驗嚟參賽喇。
陳嘉琦
潘紹麟