麥美恩大讚異國猛男好玩得 森美帶隊打明星籃球賽對戰張繼聰

麥美恩（Mayanne）早前完成港姐司儀工作後，就同周奕瑋（Jarvis）去新西蘭公幹，工作之餘亦不忘好好玩一玩，放鬆一下。Mayanne亦喺社交平台Post咗唔少同外籍男士嘅頭貼頭，比心合照，令大家都好關心佢有冇把握機會發展異地情緣。雖然Mayanne就話冇同各位男士留聯絡方式，但大讚佢地好玩得，加上用英文溝通，都傾得特別開心。講到同Jarvis一齊出埠嘅感覺，Mayanne就話Jarvis全程擔任行程規劃，而佢就負責做公關，令佢充分感受到同處女座去旅行係咩感覺。

麥美恩同森美一齊出席活動。
 
同場出席活動嘅仲有森美，好快佢就要出席電台明星籃球賽並擔任DJ隊隊長，對戰由張繼聰帶隊嘅歌星隊，所以森美都話要把握時間健身，又未開戰先「出口術」笑阿聰為拍戲少咗健身，冇自己咁大隻，歌星隊個個都係得個樣。反而佢地電台同事好得閒，冇咩工作，所以好多時間健身。至於被問阿女會唔會嚟觀賽，森美就幽默回應：「唔好提傷心事啦。」

森美話要把握時間健身。