何依婷再演新聞小花 與前輩方健儀爭新聞

何依婷Regina 繼喺劇集《新聞女王》後，為拍短片再次飾演力求上位嘅新聞小花，仲要同新聞界神級女主播方健儀Akina爭新聞。對於要再次飾演女主播，Regina坦言唔易，尤其係控制雙眼嘅節奏最為困難，之前為咗拍劇就做過唔少練習：「特別看很多新聞、練習讀新聞稿，甚至找來專業人士指導，上課學習了解主播報新聞時如何發音和咬字。」

何依婷、方健儀。

今次同資深女主播Akina合作，Regina可以近距離了解主播需要嘅手眼協調、口齒伶俐，佢仲話第時要再演呢類角色時就可以更得心應手。
何依婷再次飾演新聞小花。
喺短片中Regina同Akina同為健康節目《醫療八點檔》嘅主播，兩人各領一組，分別為《降膽固醇騙案》與《糖友聲討人氣KOL事件》中各出奇謀。片中兩人嘅鬥法當然精彩，但當中帶出嘅健康信息都非常實用，連Akina都話大開眼戒：「近年來我也有主持一些健康節目，對很多問題也有所涉獵，但這次的兩個主題也很新穎而且『貼地』，自己也要花點時間了解。」
Akina重操故業，飾演首席主播。
Akina喺《降膽固醇騙案》故事中，了解到坊間聲稱可以降膽固醇嘅保健食品，其功效一直成疑，Akina表示：「其實香港有高達51.9%香港人有高膽固醇，這些患者有機會引發冠心病、心臟病發或中風等致命心腦血管疾病，如果以為保健食品一定有效，所帶來的影響真的可大可小。」

至於《糖友聲討人氣KOL事件》則係以生酮飲食與糖尿病嘅關係為主題，Akina指雖然糖尿病係香港最普遍嘅慢性病之一，但仲有好多患者對呢個病嘅認知不足：「不知道有可能引致嚴重併發症，甚至誤信坊間所說，以為生酮飲食就足以應付。」其實保持血糖穩定嘅關鍵，不外乎適量均衡飲食、低脂烹調及攝取高纖維食物。