周吉佩戒口操肌靠輝智海報鞭策 與Ali合作節目獲獎盼再次合作

「中聲」兩位唱將 周吉佩 同 譚輝智 呢日應邀出席「國慶75周年漁農美食墟」表演，吸引唔少市民支持。

吉吉呢日現身美食墟活動，不過要戒口無緣滿場美食
最近積極備戰演唱會嘅吉吉，每日都健身操肌，不過要忍口就被佢視為最大難關喇：「今日入嚟美食墟表演，邊唱歌邊聞到啲嘢食香味，好辛苦。最近我戒口，開始食得好清，日日食雞胸同菜。想個人firm啲，其實2019年為樂隊演唱會都操過一次，不過今次好多fans留言話要睇我六嚿腹肌，我依家好大壓力，依家望住輝智演唱會張海報嚟操肌！而家得幾嚿...水咋，盡力啦！」
譚輝智亦係呢日活動嘉賓

正為開騷操肌嘅吉吉話，日夜望住輝智呢張海報而努力

吉吉與李佳芯主持嘅《日本18種住法》早前獲「2024亞洲影藝創意大獎」嘅「最佳生活消閒節目」獎，而吉吉主唱嘅《羅密歐與祝英台》片尾曲《梁山伯的華爾滋》亦獲得「最佳主題曲/主題音樂獎」。12月上旬仲會代表香港角逐亞洲區冠軍大獎，吉吉對獲獎非常驚喜：「好開心第一次主持旅遊節目竟然獲得獎項，希望可以有機會開下一季，最希望可以再同Ali合作。而《梁山伯的華爾滋》能夠得獎，都令我打咗支強心針，劇集歌係好入屋，希望有一首街知巷聞嘅劇集主題曲。」

吉吉同Ali主持嘅《日本18種住法》得獎，仲話希望有機會再次合作