吳君如陳可辛亮相國際印度電影大獎 黃金戰衣登場有意進軍寶萊塢

第24屆國際印度電影大獎頒獎禮日前喺阿布扎比舉行，匯聚來自多位寶萊塢（Bollywood）電影巨星，導演陳可辛（Peter）及影后吳君如更獲邀出席盛會，陳可辛先與印度名導Kabir Khan共同主持大師班講座，隨後與君如一同現身頒獎禮，跟Kabir Khan頒發最高榮譽最佳電影大獎，予得獎作品《Animal》。

導演陳可辛及影后吳君如獲邀出席第24屆國際印度電影大獎頒獎禮。
君如與Peter喺台上表示非常榮幸獲邀參與盛事，亦喜與一眾寶萊塢巨星交流，當中君如大讚Bollywood歌舞表演，指有意進軍當地影圈。為隆重其事，君如以一襲金色珠片斗篷配搭黑色晚裝長裙行頒獎禮綠地毯，君如指戰衣係特意迎合金光閃閃寶萊塢主題：「加咗好多珠片同寶石，成件禮服閃閃生輝，好多寶萊塢巨星都讚我靚，真係好開心。」

君如以一襲金色珠片斗篷配搭黑色晚裝長裙行頒獎禮綠地毯。
君如亦毫不掩飾對寶萊塢歌舞表演嘅驚嘆：「現場睇到表演，真係好震撼，無論係影帝影后，或者唔同年齡嘅演員，佢哋都跳得好好，嗰份熱情同活力真係好感染我，搞到自己都好想上台跳，甚至諗住進軍寶萊塢，哈哈！」頒獎禮後，君如及Peter一同出席沙魯克汗舉辦私人派對，跟一眾電影人交流，君如不忘談及佢主演嘅新片《我談的那場戀愛》，電影剛喺香港票房突破1000萬大關，成為票房與口碑雙贏嘅佳作，導演Kabir Khan已欣賞過電影，大讚「Fabulous」雖然新戲並非寶萊塢式歌舞片，但君如指愛情故事係世界共通，笑言考慮為電影補拍一場寶萊塢式嘅歌舞戲，更融入印度觀眾口味。

陳可辛與君如一同現身頒獎禮，跟Kabir Khan頒發最高榮譽最佳電影大獎，予得獎作品《Animal》。
Peter對於今次盛會印象深刻，又幽默形容係寶萊塢沉浸式體驗：「頒獎禮凌晨3點才結束，私人派對於凌晨4點開始，簡直盡興到第二朝！不得不說，今次係我哋整個職業生涯中最疲憊嘅經歷，由早上5點就凌晨到達當地，大師班上午11點30分舉行。然後下午與印度電影製作人見面，再直接參加頒獎典禮及私人派對。當我同君如返房已經係早上 6 點。 25小時不間斷！」當晚頒獎典禮高達六億六千萬收視率、22億社交平台轉發相關帖子，場館更坐滿二萬五千人，Peter笑言可能係佢哋人生參加過最大型嘅頒獎典禮。

Peter透露自己與一同主持嘅名導Kabir Khan係多年好友。
提到大師班講座，Peter透露自己與一同主持嘅名導Kabir Khan係多年好友，雙方一直有合作計劃，希望將華語及印度電影帶到國際舞台，Peter與Kabir Khan喺講座亦有就全球電影市場變遷展開深入討論，尤其針對年輕影迷觀影習慣，兩位大導演分別從華語及寶萊塢影壇角度探討點樣應對市場轉變，又談及內地與印度市場如何影響導演嘅創作願景，以及面對商業挑戰點樣同時保持創意完整。講座反響熱烈，現場觀眾對香港與印度本土電影如何走向國際市場充滿興趣！

導演陳可辛與阿布扎比電影委員會主席Al Hosani交流。