是日必聽丨黃百鳴翻唱張天賦《記憶棉》 網民戲稱聽到海豚擱淺的聲音

仲記唔記得電影《家有囍事》入面，黃百鳴以歌聲留住老婆吳君如嘅一幕？唔記得唔緊要，因為黃百鳴最近翻唱咗另一首歌—張天賦嘅《記憶棉》，唔少網民聽完之後都話繞梁三日，仲話聽完佢翻唱嘅版本之後，完全唔記得咗原唱係點呀！
最近黃百鳴翻唱《記憶棉》喺網上大熱。黃百鳴熱愛唱歌。
黃百鳴版嘅《記憶棉》最初被網民上載喺小紅書，條片瞬速喺網上hit爆，仲喺唔同社交媒體瘋狂傳播。片中穿上碎花西裝嘅黃百鳴，喺一間背景類似歌廳嘅場地同live band jam歌，唔只場地有年代感，當黃百鳴開口嗰一下，完全聽得出濃濃嘅古祖味，更加有網民留言話首歌應該改名叫做《黃百棉》，亦有人調侃話聽完百鳴哥嘅假音，成個人都昇華咗，好似睇到海豚擱淺一樣。
唔知張天賦有冇聽過黃百鳴版嘅《記憶棉》呢？