尹光銅鑼灣玩跳舞快閃 爆波友方力申球技了得

尹光雖然已經80歲，但佢依然緊貼潮流，尤其係喺工作上光B更鍾意同新一代合作擦出火花，好似最近佢就同MC Jin以及男團OneUp合作，潮玩Hip-hop兼拍咗個廣告，個個都大讚光B好身心，呢日佢仲踩落鬧市玩快閃，畀大批路人包圍呀！

尹光呢日喺銅鑼灣街頭又唱又跳，活力十足
第一次玩快閃嘅光B，就話同咁大班dancer一齊跳非常開心，問到花咗幾多時間練舞？光B就好誠實咁話自己冇練舞，只係拍攝當日練過下，但隔咗咁耐時間已經唔記得晒喇，不過即使亂咁跳佢都玩得好開心呀，光B仲話自己最鍾意同後生仔合作，因為可以「近青抗老」咁話。
佢仲話同大班後生一輩合作非常開心，仲話自己冇特別練舞

男團OneUp兩位成員 賀邦 同 方智弘 ，就話光B比起佢哋仲活潑，賀邦仲話好多時都係光B帶住佢哋去跳舞。熱愛唱歌嘅光B，表示之後都會繼續挑戰跳唱歌，仲話自己每日都會運動，好似打乒乓波同行路咁，仲話自己每日最少會行7、8千步㗎！光B又爆方力申係佢嘅乒乓波友，又指自己日前先同對方打完波，笑話小方同佢一樣咁好波呀。

光B指自己日日運動，仲話打乒乓連方力申都係佢手下敗將