星光路上丨杜如風拍《解風福岡》首有艷遇 擇偶條件專一靚仔好難搵

杜如風舊地重遊出發《解風福岡》，呢日作客TVB娛樂新聞台節目《星光路上》，杜如風與主播潘盈慧分享自己點解對日本情有獨鍾，更呻足足10年冇拖拍，連阿媽都放棄催婚。

杜如風呢日同主播潘盈慧分享點解會對日本情有獨鍾。
杜如風因爸爸當年寫日本藝能界嘅稿，屋企有好多日文雜誌同書，杜如風當時愛上木村拓哉，仲為咗更了解木村，主動拎字典查啲日文字，佢笑言冇諗過因為木村，下半生要靠日語嚟過活，後嚟杜如風去日本讀書，發現自己連嗌嘢食都唔識，佢開始逃學去打三份兼職，同啲人係咁講嘢，又識到朋友又識到男仔，杜如風坦言識男友係最好學日文嘅渠道。
杜如風話因為愛上木村拓哉，所以主動去查字典了解啲日文字。
杜如風喺日本返港後，曾想過擔任編劇，佢搵咗份工，點知主持未拎到工作簽證，上司叫杜如風頂硬上做主持，後嚟杜如風就又寫稿又做主持又剪片，佢回想整個過程好辛苦，試過三日兩夜冇瞓過，杜如風直言靠買嘢紓壓。

杜如風話而家阿媽都放棄催婚。由《流行東京》拍到而家《解風福岡》。
杜如風今次再去福岡，笑言拍咗差唔多20年旅遊節目卻第一次有艷遇，杜如風話餐飯好食到想即刻嫁畀對方，講到現實感情狀況，杜如風就話阿媽放棄催婚，皆因佢足足10年冇拍過拖，杜如風自認係鍾意靚仔同專一嘅男士，但係靚仔通常都唔專一，所以佢都自覺好難搵到。
主播潘盈慧