別了Irene Ryder丨女兒Anne稱媽咪如願家中離世 Joe Junior憶與好友最後對話

梁小龍前妻歌手Irene Ryder（黎愛蓮）喺9月1號離世，享年75歲。女兒Anne喺10月4號為亡母設靈，靈堂佈置簡潔優雅，各界致送嘅花牌放滿靈堂，梁小龍亦有向前妻表達心意。喪禮以天主教儀式進行，前來送別Irene嘅圈中人有黃淑儀同老公、姜大衞夫婦、邱禮濤導演同蘇珊等。

靈堂以簡潔佈置為主。

同Irene相識超過60年嘅Joe Junior受訪時談及兩人最後對話內容，指Irene未走前一星期，二人透過電話傾談，當時Joe Junior打畀Irene問候，對方話自己身體麻麻地，又反問Joe Junior近況，於是Joe Junior表示自己仲唱緊歌捱世界，當時Irene安慰指唔緊要，開心就得啦﹗兩人通電完後一星期Irene就離世，Joe Junior痛失一位由十四、五歲相識嘅好友極為心痛。

女兒Anne到場打點。女兒Anne為媽媽送上花牌。
Irene女兒Anne講到媽咪喺屋企時曾心跳停頓，送到醫院後搶救返，而佢就一直陪伴喺身邊，並解釋媽咪係因肺炎離世，而媽咪嘅心願想喺屋企走，結果真係喺家中離開。又指媽咪生前甚少出街，只係間中同好友姜大衞夫婦、黃淑儀及鄧光榮太太聚會。
梁小龍亦有送上花牌送別前妻。
據知家屬有感Irene生前曾受襲擊而嚴重灼傷，選擇以土葬代替火葬儀式，而辭靈禮定於10月5號上午喺柴灣舉行，並於哥連臣角天主教墳場安葬。
香港演藝人協會送上花牌。