Nowhere Boys演唱會西九揭序幕 Van狂減30磅與Nate鬥腹肌

Nowhere Boys 嘅三場演唱會星期五晚喺西九文化區大盒展開，唔少藝人好似 陳柏宇 小肥 黃妍 廿四味成員阿肥 HotCha成員Regen 仲有同門師弟 洪端珙 等都有捧場。呢晚演出全場爆滿觀眾反應熱烈，主音Van同鼓手Nate仲興奮到除衫，大騷腹肌。

唔少圈中朋友到場支持Nowhere Boys演出
出道九年嘅Nowhere Boys，今次演唱會加入演戲元素，每位成員都有角色設定，仲穿梭台下喺觀眾席演戲，令歌曲更有連貫性。Van仲預告三場演出都有唔同歌單，滿足晒歌迷網上點唱嘅要求。

Beanies成員Kay擔任表演嘉賓，之後Nowhere Boys就接連以《我們的航海時代》、《掹藤》、《信之卷》和《我們的移動城堡》為演出揭開序幕。成員「漁佬」仲分別以小提琴、鋼琴、口琴、三角鈴、低音結他、打鼓表演一人樂隊。
佢哋一連三場演出星期五起於西九舉行

之後唱新歌《放飛之旅》時，Nowhere Boys同觀眾互放紙飛機。Van仲笑言：「我之前幻想同觀眾一齊放紙飛機，好浪漫，點知現實好搞笑，我仲畀紙飛機篤中幾次。」
過往教圓潤嘅Van，呢日大騷減肥成果

到演唱《天外飛仙》同《狂想曲》時，Van同Nate興奮除衫曬腹肌。Van仲笑言希望下次加入其他成員。為今次開騷三個月狂減超過30磅嘅Van，原來全因偶像鄭伊健一句說話：「伊健睇完我哋之前嘅演唱會影片後，佢畀我嘅意見係『減肥』，於是我應承佢，一定會做到，就喺今次演唱會兌現。」雖然伊健未有到場，不過都送上果籃打氣。
同Nate齊齊騷肌嘅佢，仲話係緣自偶像伊健嘅一句話

佢哋以《地球候機室》、《大步走》同《我在》為歌迷Encore，期間Van感觸落淚，其他成員亦眼濕濕。佢話：「《大步走》係8年前作品，唱呢首歌時諗返Nowhere Boys每一次演出嘅點滴，望到台下觀眾，諗到佢哋陪我哋走到呢一步。其實我要對觀眾道歉，作為主音唱歌時喊會影響表演，但真係好感動。」