周杰倫網上徵求稀有網球拍 啱心水即送大巨蛋個唱飛

周杰倫 即將喺12月初喺台北大巨蛋開騷，佢仲係首位喺台北大巨蛋舉行專場演唱會嘅歌手。周董開騷消息一出，歌迷都已經蠢蠢欲動準備搶飛，大家都擔心會一票難求，不過而家竟然有機會可以得到免費飛，仲要係周董親自送比你呀。

12月就喺大巨蛋開騷嘅周董，近日竟然主動送飛
事關周董4號深夜突然喺IG出post話要送飛，不過當然唔係白白送，係有條件㗎！就係要幫佢搵到稀有嘅網球拍，近期迷上收藏稀有網球拍嘅佢話：「如果各位球友有在網路上看到厲害的、沒看過的、超級限量的，請Po上主頁標記我之後再刪掉也行，到時候哥會來看看到底有沒有我沒看過的，選出來把演唱會門票送出去，大家覺得如何？」
近年迷上打網球嘅佢，公開向網友徵求稀有球拍

佢仲搞笑話自己係球拍上癮症候群，周董強調：「這篇發文沒經過公司同意，但我不管了，不管你在任何城市，演唱會門票送出去，看得出來我找球拍找到瘋掉了吧！」
佢仲自認近日為搵球拍搞到自己有「球拍上癮症候群」

消息一出，即刻得到粉絲熱烈反應，紛紛上傳網球拍相，而周董亦親自回覆，有啲寫住：「看過囉」，當然亦有粉絲雀屏中選，得到周董回覆「恭喜」。不過活動已經截止，周董話會透過IG限動公布得獎幸運兒。

活動已經結束，大家都係準備搶飛啦