修哥為老友記表演有意再破紀錄開騷 十一哥同任愛心大使75歲仍健壯

精靈活潑嘅修哥 胡楓 同十一哥 何國材 呢日應邀參與「長幼共融 耆樂無窮」啟動禮，被委任為愛心大使嘅佢哋喺活動上為現場一眾共700多位老友記唱歌表演，令大家非常高興。

修哥呢日一出場就大受現場老友記歡迎
修哥呢日一出現場嘅老友記就非常雀躍，仲不斷搵佢合照。而修哥亦一同同大家握手合照，之後又先後為大家表演兩首歌，唱《友誼之光》時，仲叫台下老友記一齊郁動當做運動。修哥搞笑話 : 「拍手掌、 有福享」 ，台下老友記就齊齊拍手掌，又話：「 我一見到老友記開心我就開心，所以幾乎每有呢類活動我都係逢請必到。」

提到活動主題係長幼共融，修哥就即時諗起四個曾孫喇：「佢哋係我心肝寶貝，一見到就好興奮，不斷講I Love You，我真係好感恩有佢哋幾個，一個星期我會見佢哋一次。真係樂無窮。」
佢為大家唱歌又提醒要保持運動

日前剛自泰國返港嘅修哥，又指今次旅程玩得非常開心，每日都享受唔同美食，加上自己出名係活躍派老友記，所以更加要識得保持身體健康。
早年以最年長歌手喺紅館展開演唱會嘅佢，外傳有計畫再刷新自己紀錄，呢日佢亦回應話： 「一切都未知，係有機會再開，因為開演唱會係好開心。 希望一直破紀錄就最好。」
修哥仲話有意再開演唱會刷新自己嘅紀錄

十一哥亦係呢次活動另一位愛心大使，佢自爆已經係75歲嘅長者，佢仲話健康秘訣就係開心，當一個人開心時候，細胞就會活躍，精神好多。 

十一哥一啲都唔似已經75歲