黑色月光丨楊茜堯相隔七年重返娘家 演虐心戲因童年遭遇強姦展開連場報復

集合兩大視后楊茜堯同林夏薇主演嘅台慶劇《黑色月光》，將於10月28號喺TVB翡翠台首播，茜堯相隔7年重返TVB，聯同親家姐楊卓娜喺劇中演兩姊妹。故事講述佢哋因為童年被強姦而上演連場報復，虐心劇情絕對令觀眾期待。劇集開工前，茜堯專登返電視城同有份演出嘅馬志威、楊卓娜、林夏薇、何廣沛、馬貫東，仲有總監製鍾澍佳一齊圍讀。

《黑色月光》楊茜堯相隔7年重返TVB，聯同親家姐楊卓娜喺劇中演兩姊妹。
茜堯講到今次回巢原因係生完BB後一直冇拍劇，而鍾澍佳亦係佢未合作過嘅監製，所以對方收到邀請時，茜堯都好受寵若驚，個角色仲係度身訂造。茜堯返娘家份外有親切感，加上見到熟悉面孔就特別興奮，好似佢同薇薇兩個一走埋就不停尖叫大笑。

馬志威首次參演TVB劇集，劇中同薇薇有大量對手戲同床戲。
卓娜同茜堯喺劇中同現實生活都係姊妹關係，但係劇中佢哋有好多嗌交場口同鬥爭，跟現實生活有好大反差，卓娜笑言將多年嚟對妹妹嘅不滿喺劇中爆出嚟，佢又透露喺劇中造型會係女神級數，可以用倒三角嚟形容。

何廣沛話相當年拍攝《守業者》時，茜堯已經係主演，而佢係企喺一百米後嘅小演員。
首次參演TVB劇集嘅馬志威，劇中同薇薇有大量對手戲同床戲，而佢同馬貫東飾演由細玩到大嘅兄弟，今次嘅角色亦成為兩位馬生嘅一大挑戰，佢哋異口同聲都話未演過咁多面目嘅角色，要好好思考點演繹。何廣沛繼《新聞女王》之後再參演佳導嘅作品，先後同視后佘詩曼及楊茜堯飾演對手，廣沛話相當年拍攝《守業者》時，茜堯已經係主演，而佢係企喺一百米後嘅小演員，遠遠留意演技，估唔到有機會演對手戲！