獨家丨黃劍文出動兩愛貓拍攝新歌MV 自認怕醜唔敢表白屬祝福系

黃劍文（Kimman）近日忙於為演唱會綵排同健身，日前佢就抽時間為新歌《默默》拍攝MV，為咗令畫面更有親切感，劍文就搵嚟佢兩隻愛貓參演。新歌講述男主角Kimman暗戀一位女性，默默守護在旁。

黃劍文為新歌《默默》拍攝MV。
Kimman喺現實中認為愛一個人唔一定要得到對方，反而認為愛係一種守護，所以灌錄呢首慘情歌時，Kimman喺錄音室勾起唔少畫面，加上林若寧嘅填詞好觸動到佢，最終更忍唔住喊咗出嚟，Kimman相信世界上有好多同類男性，覺得自己嘅想法並唔孤單。
《默默》MV截圖。
歌曲中嘅主角完全係默默為傾慕者而付出同守候，現實生活中，Kimman喺小學同中學都分別暗戀過對象3年，礙於自己性格較內向怕醜，唔太擅於表達自己，自稱情場上屬於「祝福系」。
黃劍文嘅愛貓都有參與拍攝。