中年好聲音3丨三位5燈選手兩人陷危機 梁文君被伍仲衡狠批唱功似AI

《中年好聲音3之大灣區新馬PK戰》今晚（13日）將會上演大灣區與新馬區PK戰最後激鬥，本集對戰陣容如下：梁文君《紅茶館》VS尤詩郡《當愛已成往事》、高菲《愛上一個不回家的人》VS陳麗寶《月光愛人》、潘紹麟《愛在記憶中找你》VS關霈靈《高山低谷》、林立鋒《我應該》VS何平秋《酒矸倘賣嘸》、伍耀東《藍雨》VS蔡靜婷《陀飛輪》。

梁文君
本集PK戰相當激烈，三位5燈選手中有兩人表現失準陷危機！首對PK組合係新馬區3燈選手尤詩郡對決大灣區5燈選手梁文君，不過獻唱陳慧嫻歌曲《紅茶館》嘅梁文君，就被伍仲衡狠批唱功似足AI「冇人性」，而周國豐則點評佢雖然唱出少女情懷，但就演繹得過份似陳慧嫻版本。而佢嘅對手尤詩郡就將14年單親媽媽故事帶到舞台，一度唱至眼泛淚光，獲周國豐大讚將難度極高嘅李宗盛歌曲處理得相當有感情：「你正正畀到嗰種兩個好深愛，但最終唔可以行埋一齊，從你歌聲裡面感覺得到。」不過肥媽同曾路得就指佢有唱功但揀錯key。
 高菲
同為5燈選手嘅高菲，今集向難度挑戰獻唱《愛上一個不回家的人》，卻被張佳添直指未能好好駕馭：「走出舒適圈係要，但唔係一走走到咁遠，咁就會好唔舒適。」
潘紹麟
另一位5燈選手潘紹麟，上次因為得意忘形狂搞gag，惹來評審巫啟賢不滿；今次明顯收斂搣甩囂張態度，只唱歌不說話，獲肥媽大讚：「唔講嘢，唱歌真係幾好㗎！」向來評分嚴格嘅周國豐與伍仲衡同樣給予好評，周國豐：「演繹好穩打穩紮，唯一要挑剔係（把聲）太林峯。」而伍仲衡則激讚：「我覺得你有排玩，你有自己style！不過上次我同另一位參賽者講有排玩，下一個round就走咗，所以你唔好當真。」
關霈靈
至於曾為歌手的何平秋，就獲張佳添大讚「技術性擊倒」，更形容佢係《中3》嘅李佳：「你仲有好多空間去進步，但呢隻歌的確唱得好。」伍仲衡亦讚佢有個人風格。
何平秋
今晚將揭曉15位「最終晉級選手」，未來將與香港區選手正面交鋒，究竟花落誰家？密切留意今晚播出嘅《中年好聲音3之大灣區新馬PK戰》。

《中年好聲音3之大灣區新馬PK戰》13號 20:30 翡翠台

陳麗寶