衛詩雅交由經理人籌備婚禮 請周家怡做姊妹幫忙壓場

今年6月宣布將同醫生男友結婚嘅 衛詩雅 ，明年2月就會舉行婚禮正式成為人妻，但係呢排工作忙碌嘅Michelle透露，會將籌備婚禮嘅重任交俾經理人，仲話近月經理人已著手幫佢籌備，更指打算當日早上先喺教堂行禮，晚上擺酒筵開廿多席。

衛詩雅明年2月就會舉行婚禮正式成為人妻。

Michelle指有試過搵婚禮策劃公司，但最終覺得經理人先最合適，講講吓Michelle更大讚經理人辦事能力，又向單身多年嘅主播 許文軒 Hard Sell經理人，想順便做埋媒人，可惜最終被Edmond巧妙拉開話題。

Michelle指自己唔會為婚禮特別瘦身。
一向纖瘦嘅Michelle又指自己唔會為婚禮特別瘦身，原來佢同未婚夫已影咗一輯婚紗相，婚禮當日所著嘅裙褂亦已㨂好，但係婚紗就尚未有定案，不過就確定係經已請到陳家樂、周家怡同識於微時嘅好友李蘊等擔任姊妹團。佢又大讚周家怡可靠，旨意佢婚禮當日為自己「壓場」，以免兄弟團亂嚟，而Michelle因為之前為家樂結婚時擔任兄弟，家樂呢次就會加入姊妺團還人情喇。