陳豪讚老婆陳茵媺投資有道 爆二仔最慳家阿女最豪爽

暖男陳豪（阿Mo）平日沖咖啡同演戲都冇得頂，阿Mo自認理財好精明，有時都要搵專業人士增長財富，呢日阿Mo拍一個銀行廣告大方分享財富增長之道，話因為有家庭，佢都想有時唔返工都有財富增長。

身為一家之主嘅陳豪，對財富增長同管理都非常注重
一個成功男士背後都有一位精打細算嘅賢內助，阿Mo大讚老婆陳茵媺投資有道，有時買股票有時炒外匯，又有時買黃金，阿Mo稱讚老婆有投資眼光，兩公婆都為子女着想一早有部署。
佢仲話太太陳茵媺係屋企嘅財政同投資大神

阿Mo笑指一早透過畀零用錢掌握到三個仔女嘅價值觀，指大仔Aiden喺買嘢上有格價、二仔Nathan最慳家只買平嘢、細女Camilla為美食不惜一切，花錢最豪爽，阿Mo就話阿女真係要小心，被問呢個性格似邊個，阿Mo笑笑口講唔知！

佢仲話平時觀察到子女嘅消費情況，發現佢哋各有唔同習慣