陳柏宇與日本歌姬milet合作 貼心以軟糖縫製成斜孭袋贈對方

陳柏宇Jason 搵嚟日本爆紅歌姬 milet 合作新歌《Cheat Day (feat. milet)》，並製作中、英文兩個版本，milet 更首度挑戰獻唱廣東話，為咗呢次嘅合唱，監製 Edward Chan 喺選曲前做咗大量資訊搜集，了解 milet 嘅曲風及對音樂嘅喜好，無意中發現咗佢幾個特點：同Jason一樣擁有加拿大背景，可以唱英文歌；喜歡爽快音樂類型；對廣東歌有研究！
陳柏宇Jason 搵嚟日本爆紅歌姬 milet 合作新歌《Cheat Day (feat. milet)》。
基於 milet 講得一口流利英文，所以一早就預咗佢可以同 Jason 合唱英文歌，但估唔到 milet 都想挑戰唱廣東歌！所以 Edward 除咗搵黃偉文填寫廣東話版本歌詞外，亦搵嚟林寶填寫英文歌詞。
陳柏宇特登飛到日本錄音。
為咗喺錄音時可以同 milet 交流互動，Jason 專程飛到日本與 milet 喺同一錄音室內灌錄歌曲，而喺 Jason 完成錄音剪輯過後，milet 喺翌日亦展開錄音工作，佢先完成英文嘅部份，到灌錄廣東話時，香港嘅製作團隊即時教 milet 一個廣東話俚語：「打大佬！」
milet 事前做好晒功課。
雖然廣東歌詞發音較為複雜，但 milet 事前準備充足，搵嚟同事幫佢預先將日文拼音拼好，而灌錄時 milet 又很用心咬字，務求精準地發音，milet 用咗一日時間完成中、英文版、主音及和音部份，效率極高之外，亦可見佢事前花咗唔少功夫準備！
Jason特別帶咗 milet 至愛嘅黑加侖子軟糖送畀佢。
Jason 同 milet一見如故，相當投契，Jason特別帶咗 milet 至愛嘅黑加侖子軟糖送畀對方，仲好有心思地將多包軟糖縫製成一個斜孭袋，milet 見到即興奮表示：「Oh my god！呢個係我收過最正嘅禮物！」
Jason仲畫咗畫畀milet。
milet見到軟糖後即心心眼，Jason就溫馨提醒對方啲糖夠食半年，叫佢唔好太快食晒，點知milet 眼中只有 Jason 手上另外兩包軟糖，只係諗住要拎走嗰兩包糖，Jason講嘅嘢完全聽唔入耳，十分搞笑！此外，Jason亦喺心意卡上寫咗下意畫圖畫，不過 milet 見到即笑話好cute，Jason表示：「我畫功係咁㗎，你慢慢再睇啦！」