黃劍文處男騷見周慧敏即落淚 獲譚輝智力邀齊摸肥媽腹肌

黃劍文Kimman喺《中年好聲音2》展開追夢之旅後，除咗人氣急升外，仲令佢實現人生夢想，喺23號晚舉行人生首場音樂會，為咗答謝歌迷嘅支持，Kimman就喺台上大方除褸騷肌。

黃劍文終於舉行自己嘅首次個人演唱會
演唱會嘅高潮可以話係一浪接一浪，除咗同葉巧琳再喺舞台上重聚外，譚輝智出場時更令現場氣氛再推至另一高峰。輝智同Kimman合唱完後，就話要為對方嘅fans驗證一下，講完就伸手去摸Kimman嘅腹肌，輝智話自己每次做嘉賓都會落手去摸，又指自己嚟緊做嘉賓都會繼續呢個「傳統」，Kimman聽完即話輝智下次係做肥媽同黑妹嘅演唱會嘉賓，點知輝智超大膽咁話：「照嚟㗎喇！一齊啦！」嚇到Kimman即刻話對方黐線，仲話自己唔做呢啲嘢。
嘉賓譚輝智一上場就手多多

以壓軸嘉賓身份現身嘅周慧敏，就喺台上分享自己咁撐Kimman嘅原因，又指佢哋係會互相鞭策對方嘅好友。
周慧敏以壓軸嘉賓身份現身

騷後Kimman接受訪問時，坦言淨係做一場唔太夠喉，佢又指覺得自己仲有好多進步空間，可以做得更好。提到周慧敏出場時佢忍唔住喊，Kimman就話其實係綵排時提境對方，自己都已經忍唔住，因為阿V喺佢成個追夢過程畀咗好多支持自己，加上阿V而家正忙緊自己嘅巡迴演唱會，但仍然抽時間嚟做佢嘅嘉賓，令佢好感動呀。