莫鎮賢偕四大女神開騷 分享與已故好友黎明詩最後之約

莫鎮賢相隔三年後再度舉辦演唱會，今次於12月4號演唱會佢邀請咗李樂詩、何婉盈、文佩玲及「中一生」李泇霖一齊同台獻唱。眾人於24號舉行記招，除咗莫鎮賢嘅契媽林小湛到場打氣外，一眾《中年好聲音》歌手亦有出席支持。
契媽林小湛都有到場打氣。
記者會上莫鎮賢分享今次舉辦呢個演唱會嘅原因：「今次做《唱好女神》演唱會，就係想繼續將好嘅音樂傳承開去，呢行自己都好多好朋友，所以明年都會再開Part2、Part3。我仲造咗首新歌《這是你》，到時會喺演唱會首次公開唱畀大家聽。」
李泇霖被莫鎮賢封為「食之女神」。
莫鎮賢指每個人心中都有自己嘅女神，而佢就話自己心目中嘅女神係冇形象：「外在係唔重要，呢啲好快會厭倦，所以我覺得係善良、善良同善良。」對於今次幾位嘉賓，莫鎮賢就逐一為佢哋封號，先係嚟自《中年好聲音》嘅李泇霖，莫鎮賢笑指因為對方最愛食，因此封佢為「食之女神」，對此李泇霖表示：「有前輩搵我做嘉賓，真係喜出望外。喺我心目中，女神應該唔分年齡、唔分高矮肥瘦，用心追求理想、肯堅持嘅女仔就係女神。」
何婉盈被封為「智慧女神」。
而被讚又靚又有才華嘅何婉盈，就被莫鎮賢封為「智慧女神」，何婉盈聞言表示：「我覺得女神除咗樣靚，學識都好緊要，唔一定係讀書好好，但係要有出色嘅技能，好似古代女性都會學琴棋書畫咁。現代女性又更叻，好多都多才多藝，肯學又有上進心，我好多女性朋友都自己創業做女強人，佢哋嗰份幹勁已經係女神級。」
李樂詩係「快樂女神」。
被莫鎮賢封為「快樂女神」嘅李樂詩，表示修養及內涵同樣係女神必備嘅條件：「我覺得要做女神，氣質都好緊要，優雅、高貴，談吐大方，舉手投足都有種好自然嘅魅力。」
女神界天花板林小湛。
莫鎮賢契媽林小湛壓軸登場，佢大讚對方係自己心目中嘅女神典範：「大家都知小湛姐係禮儀導師，有好多學生，演技又好好，仲永不言休，好多謝佢今日親自嚟支持我。」林小湛透露1992年認識柯德莉夏萍：「佢真係好優雅、好高貴、好善良，佢係好多人心目中嘅女神，佢仲做好多善事，所以我心目中嘅女神，唔一定要靚，只要內心係充滿愛就係女神。」
已故歌手黎明詩。
莫鎮賢提到最後一位女神，係已故好友黎明詩：「佢嗰時話幫我彈首新歌《這是你》，要做我MV嘅女主角，當時我都唔知佢癌症復發，臨走嗰晚，我喺醫院守咗兩晚，當時佢已經坐唔到起身，但係佢望住個天喺度笑，因為佢想大家都開開心心，唔好為佢喊苦喊忽。」他表示於演唱會當晚將首度播放《這是你》的MV，與眾樂迷欣賞好友嘅風采。

曾參與《中年好聲音2》嘅鮑聖光同何博文呢日亦驚喜現身，而莫鎮賢亦即場許下承諾，明年再辦「男神」演唱會將邀請佢哋參與。

左起：何博文、何婉盈、林小湛、莫鎮賢、李樂詩、李泇霖、鮑聖光。