楊茜堯首度開腔回應 14年前被指批㬹胡定欣事件

楊茜堯接受主播 潘盈慧 專訪，大方談及多年前流傳佢喺2010年《萬千星輝頒獎典禮》台上批㬹兼互藐胡定欣一事。舊事重提，茜堯就話自己當時冇管理好自己表情。
楊茜堯為當年批㬹事件解畫。

首度回應事件，茜堯話頒獎禮翌日瞓醒起身，就發現成個社交平台被人炸爆留言，所多人傳條片佢睇，佢就即刻登短訊畀定欣問發生咩事，定欣就表示唔使理，只係截圖，結果條片就流傳咗十幾年。
呢個畫面畀網民傳足 14 年。
茜堯還原真相，指當日徐子珊企佢身邊，當佢聽到子珊話「我好凍」後，佢就做出流傳中表情同動作向子珊話「好凍咩」。茜堯指認識佢嘅人都知佢唔會批人㬹，更加唔係一個鍾意澄清嘅人，所以就咁多年都冇回應，而今次專訪中被問及，先開腔回應。
楊茜堯話自己唔係一個鍾意澄清嘅人。