巾幗梟雄之懸崖｜花絮－七爺導賞自家地盤永業銀行

啱啱首播嘅台慶劇《巾幗梟雄之懸崖》喺橫店打造實景拍攝，呈現華麗嘅舊上海面貌，飾演劇中頂級首富嘅 胡定欣 ，角色名其實暗藏玄機，「七爺」代表住上海財力排第七嘅風雲人物，而佢所擁有嘅三大銀大之一－永業銀行更係氣派非凡，大老闆「七爺」呢日就親自帶大家遊覽劇中佢所掌控嘅銀行喇。

單睇《巾幗》嘅海報，已經感到七爺胡定欣嘅強勁霸氣
七爺唔使講一定有豪華辦公室，佢嘅得力助手 黎耀祥 飾演嘅柴十七，所屬嘅工作枱亦對正七爺，等佢隨時可以召喚柴十七獻計！而辦公室對出亦有一條長長嘅走廊，七爺同一眾手下列陣行入會議室，全靠呢條走廊營造氣勢。
身為大上海第三大銀行掌舵人，七爺嘅氣派當然同普通人唔一樣

之後七爺又為大家介紹劇情另一推進重地－會議室，喺呢個可以容納幾十人嘅會議室中，多場爭權、蕩氣迴腸嘅戲份都會喺度上演，定欣亦透露將會有七爺被意圖奪位嘅戲碼會出現，但係佢絶對唔會咁容易中招。戲外定欣亦好開心幕後打造咁真實嘅大銀行場景令大家好容易入戲，代入劇集嘅時代。

會議室氣份肅穆，邊個膽敢唔對七爺號令言聽計從？