容祖兒恨自駕遊去西藏旅行 與周迅錄節目讚對方又靚又Nice

好耐冇喺香港出席活動嘅 容祖兒（Joey）呢日終於返到嚟香港，為一款新推出嘅電動車擔任揭幕嘉賓。因為Joey成日都要坐長途車穿梭內地各城市工作，所以佢對保姆車都好有要求，好似風口位唔可以兜口兜面吹到正、車內嘅坐椅要舒適等。
容祖兒呢日返到香港出席活動。
而家好興揸住架露營車去自駕遊，Joey就話自己幻想過自駕遊去西藏行個圈，而今次架電動車就好吸引到佢喇。
祖兒話自己都有興趣自駕遊。
早前Joey喺北京同孫耀威、周迅錄影內地嘅綜藝節目時被人野生捕獲，傳媒大讚Joey狀態好靚出新高度，呢日Joey就謙虛咁話覺得周迅都好靚，又指可以同對方做一個節目相當難得，因為喺佢心目中周迅係一個電影演員，所以好難得可以上同一個節目；Joey又指周迅畀人好Chill嘅感覺，而佢哋喺節目中就好似一班朋友去唱K咁。
祖兒讚周迅好靚女。
提到蔡一傑早前完成一個大手術，Joey就話希望對方可以快啲康復，回復最佳狀態，再喺舞台上展現自己最靚嘅一面。
祖兒希望蔡一傑可以早日康復。