徐天佑老婆店舖被電影公司硬闖拍攝發長文呻：同強姦其實冇分別

徐天佑老婆Olive Wong於22號喺自己開設嘅護膚品牌INUF嘅IG專頁上，發出「限時傷心💔post分享」，指她於中環九如坊嘅店舖，喺未被允許下進內拍攝，直言成件事「同強姦其實冇分別」，又指咁樣嘅製作團隊，難怪港產片會每況愈下。
徐天佑老婆Olive Wong於專頁發長文。
事件起因係有一間電影公司早前曾聯絡INUF嘅九如坊店，表示想借場拍攝一部賀歲片，當時INUF喺帖文中寫道：「我哋清晰回覆佢哋需要逐小時計的租場費用，以及如果有任何損毁都需要佢哋負責。」INUF指當時電影公司指到時拍攝器材同工作人員都唔會入內，只係演員入去兜幾個圈好快就出返去，不過INUF亦表明都需要按借用場地一小時嘅費用來計算，而由於當時店家與電影公司未有共識，所以店家就未有再理會。
徐天佑老婆Olive Wong於專頁發長文。徐天佑與太太Olive Wong。
直到22號下午，INUF員工發現電影公司嘅工作人員、拍攝器材同演員都喺店外準備就緒，由於當時店內有客人做緊Facial，所以店員已即時與工作人員交代清楚唔可以入店內拍攝：「說時遲那時快，突然工作人員放低咗個對講機喺店內門邊，兩位演員無啦啦走咗入嚟兜幾個圈，個對講機突然勁大聲向演員發出指令，演員又好大聲咁講對白。大佬！我哋上面有兩位客人休息緊㗎！店內工作中嘅同事完全反應唔過來，之後佢哋又再次入嚟做同一樣嘅事，有crew仲要話我哋同事影佢哋相（🤯⁉️下）搞到我啲同事好驚。」
Olive Wong不時會到九如坊台巡視業務。
INUF喺帖文中指雖然成件事只係10幾分鐘，但就直斥呢種夾硬嚟嘅做法同「強姦其實冇分別」，INUF指平日如果係客人影相打卡佢哋會好開心，但拍電影係商業用途，所以在商言商係要計數，並揶揄表示：「你哋請個臨記都要封番封利是啩？！」雖然成篇帖文冇開名講係邊套戲同有咩演員，但佢哋喺帖文尾就表示：「套戲我唔知係邊套，話係賀歲喜劇，我亦都唔想講明係邊位演員，因為其實唔關佢哋事，公司則是本地製作有限公司，這樣的製作團隊難怪港產片每況愈下。」
上環九如坊嘅店舖。
唔少網民都戥店家不值，有人提議可以透過法律途徑解決事件，而亦有於上環開咖啡店嘅「苦主」，同樣喺IG專頁中表示被電影工作人員指罵：「今日返工嘅路上，係一條人來人往嘅行人路上，無啦啦有人又走埋嚟話唔好影佢相...路過啫，使唔使咁敏感，同埋佢係邊個？仲叫啲行人行快啲。」之後更出post為大家惡補法例：「本港沒有法例禁止市民在公眾地方拍攝，但如身處私人地方，業權持有人可訂立『不準拍攝』等規定，並有權要求違反者離開。即係任何市民都可以係公眾地方拍攝，佢得，你都得。」
於上環嘅咖啡店「苦主」亦有post呻。於上環嘅咖啡店「苦主」亦有post呻。
而據資料顯示，香港正拍攝中嘅賀歲片有兩部，一套係葉念琛執導，馬國明、高海寧主演，以麻雀為題材嘅賀歲片，而另一套則由伍健雄（雄叔叔）監製、蔡卓妍、張繼聰主演嘅賀歲片，而伍健雄正係本地製作有限公司嘅電影投資及製作人。