郭富城慶生方媛兩女甜賀慈父笑 賽車獲獎再與300人慶歌迷會周年

星期六係 郭富城 59歲生日，繼日前於湖南洙州落場賽車勇奪季軍事，成為今年生日周嘅首個禮物之後，近日佢又返到香港，同逾300位Fans一齊慶祝歌迷會成立34周年同生日，Aaron又頒發年度獎學金予兩位6歲同11歲嘅小歌迷，希望佢哋奮力學習。

城城同方媛仲有女女一齊慶祝生日
城城又指會將歌迷送贈嘅利是，捐到名下嘅慈善基金幫助有需要嘅人，之後全體又一齊合唱早前佢為歌迷而創作嘅《您》，場面非常感動。
同太太面貼面合照非常滿足

而正日生日Aaron就同太太仲有兩位寶貝小公主一齊慶祝，城嫂方媛就貼出一系列相片，一家四口喺擺滿枱面嘅幾個巨形蛋糕前合照，城城一面滿足微笑非常溫馨，另一張佢又攬住太太面貼面甜蜜合照，真係閃到暈呀。
Chantelle親手畫生日卡祝Daddy演唱會順利

Charlotte亦都一樣畫生日卡俾Daddy

城城多年來收過嘅禮物應該數之不盡，不過相信最為珍貴嘅，一定唔少得兩個囡囡 郭詠希(Chantelle)同郭詠萱(Charlotte)親手機寫嘅生日卡同圖畫喇，大女仲祝Daddy嘅演唱會順利，而方媛仲開心到同老公舞蹈造型嘅蛋糕合照。

日前佢先以賽車佳績迎接生日周來臨