Grand住去大阪丨C君帶團歎全世界最貴壽司 高海寧預告去做頂級spa

見到C君出現喺機場，就知道佢又要出發Grand住去旅行啦！今次佢就會同高海寧、陸浩明一齊《Grand住去大阪》。

高Ling、C君同6號出發拍《Grand住去大阪》
C君預告今次行程嘅豪華程度會再upgrade，先係跟銀行包機同客戶一齊出發去大阪，高海寧就話唔只可以去做頂級spa，仲可以入住天花板級別酒店。6號亦預告佢哋會喺當地坐豪華火車、食靚嘢睇靚景買名牌同睇名車，總之成個旅程都係豪玩歎。
高Ling仲應承節目唔會令大家失望咁話

講到食方面，C君指食米芝蓮餐廳係基本嘢，佢哋會邊食邊睇藝伎表演之餘，仲會去品嘗全世界最貴嘅壽司，平均要成30幾萬Yen一個人，即時聽到身邊嘅高ling嘩嘩聲。問到3位會喺當地留幾耐？C君脫口而出話自己冇諗過返嚟，仲話自己已經同老婆講咗呀。
此行佢哋仲會嘆極高級壽司，又會睇藝伎表演

每次去旅行都一定會做spa嘅高ling，就即場邀請6號一齊去做spa，而6號亦大膽咁話日本好多都係男女湯一齊嘅，C君聽完就即刻溫馨提醒6號係有女朋友之人，於是6號就改口話自己係提醒製作組唔好去男女湯一齊嘅spa呀。

《Grand住去大阪》將於11月16號播出。