「中聲2」兄弟班下月中開騷圓夢 米羔威煌夥梁浩賢甘永傑閃耀舞台

自參與《中年好聲音2 》後成為好友嘅  顏米羔 劉威煌 梁浩賢 同 甘永傑 月中將喺麥花臣場館舉行《ZONE D FUNtas4ic音樂會》，門票下星期一就公開發售。
音樂會四位主角希望藉演唱會主題「ZONE D」兄弟情；同「 FUNtas4ic」好玩，帶俾觀眾充滿情誼，又無需太認真嘅周末，最近公開嘅音樂會海報，仲見到佢哋身穿西裝喺黃昏於郊外大草原野餐聊天，充分表達呢個有趣意思。

顏米羔、劉威煌、梁浩賢同甘永傑宣佈下月中將舉行音樂會
呢次海報攝影同設計都由米羔一手包辦，更以強勁效率三日內完成，佢話：「《中年好聲音》唔止大家圓夢，亦都帶俾唔少人希望，大大小小嘅演出機會令我大開眼界，儘管距離開show 時間非常緊迫，但我哋同製作團隊相信齊心就事成，大家一定可以享受我哋嘅精彩演出。」
海報由米羔負責，短短3日就完成推出

而劉威煌就指：「要喺音樂路上搵到一班志同道合嘅兄弟已經唔容易，我哋由比賽開始已經建立好好默契，而家仲可以一齊開show，可以講係音樂路上另一個春天。人到中年，我本來以為比賽完結就會回復平靜，繼續做返之前做嘅事，但比賽期間，我感受到好多參賽者心態同我一樣，唔止台上面，而係整個過程中享受比賽。所以參賽者大家都成為好朋友，而且比賽結束後仍然不斷互相鼓勵同支持，真係好似多咗一家人一樣，遇到問題大家都同心協力做好，我亦好榮幸可以身處其中，一齊去繼續追尋夢想。」
威煌指參賽後同大家相處，就好似多咗一班家人一樣

至於梁浩賢就話：「音樂會以一種非常Funny但又認真嘅方式呈現，以音樂表達我哋幾個嘅感受，當初參加《中年好聲音2》就係為搵返歌唱嘅感覺，唔止令我達成心願，亦認識一班好朋友，最開心係是可以一齊舉行今次音樂會，令大家可以從新認識我。」
梁浩賢就指今次希望觀眾體驗既放鬆亦非常認真嘅演出

最後甘永傑就話：「今次開騷好興奮，好Amazing，雖然今次籌備時間比較急，但我哋就講笑話大家心態已經Ready好多年，非常感恩可以同台演出，以往我哋雖然一齊演出過，不過係以嘉賓身份唱幾首歌，所以真係好期待今次。海報想話俾大家知雖然已經係中年人，但一樣有孩子心，鍾意去玩亦願意嘗試新事物。比賽結束後大家各有各忙，時間非常唔夠用，我兼顧建築師工作亦繼續追夢，想多謝我太太，如果冇佢打點家庭大小事同照顧女女，我都冇咁多時間任性追歌手夢。」

甘永傑要忙正職又要唱歌，佢就話多得太太全心為屋企付出喇

四子嘅音樂會門票下周一起公售