尚羚推出第3張爵士樂專輯 女女老公相處故事融入歌中

尚羚繼2021年推出專輯《TWO FOR THE ROAD》之後，相隔3年再推出全新個人爵士音樂專輯《3 & More》，仲喺藝穗會呢個充滿氣氛嘅場地舉行發佈會，老公RubberBand成員 馮庭正（阿正）同囡囡豆豆亦到場落力送上支持。

Sherine出新專輯，老公阿正帶埋女女豆豆捧媽咪場
獨自來港發展模特兒同歌唱事業已經17年嘅Sherine，曾被稱為「翻版邱淑貞」。雖然已為人妻同人母，不過一直無減佢對爵士樂嘅熱愛。佢亦新專輯嘅創作概念：「第一首歌由3個樂器彈奏開始，第二首就有4個樂器咁，一路加上去，所以叫《3 & More》，同時都可以話係代表我、我先生同豆豆，因為呢件事係我哋三個去開始嘅。我記得造完第二張專輯嗰陣，我哋三個喺咖啡店，好隨意咁話會唔會下星期就可以錄音呢，講吓講吓就真係開始咗。」
新專輯邀請世界各地唔少知名樂手一齊合作

Sherine今次分別邀請來自香港、日本、荷蘭同法國等各地知名樂手合作，第三張專輯更係一圓自己嘅人生清單，圓夢於美國推出大碟：「收到呢個消息嗰陣，我真係好開心，因為美國係爵士音樂嘅發源地。我自己都喺美國上過好多堂，遇到好多好好嘅老師，所以對我嚟講，係一個好大嘅驚喜，你做咗一啲嘢，都好想人哋聽到㗎嘛。如果我喺美國嘅老師都留意到呢張碟，我諗佢哋都會為我感到驕傲。」
佢仲話明年會返大馬宣傳，又希望到唔同國家演出

佢仲話明年將到出生地馬來西亞宣傳同演出，又有計劃到美國同歐洲，同唔同地方嘅人分享自己創作嘅音樂。新專輯當中有兩首歌別具意義，其中《Waltz for Debby》就描述母親對孩子日漸長大嘅不捨喇說：「11月豆豆就4歲，我好想見證佢每個成長嘅階段，雖然日日陪住佢，但係都覺得佢長大得好快，然後就會好珍惜、好珍惜而家嘅時間。有時我喺屋企執嘢、洗碗都會唱呢首歌，然後豆豆又會跟住我唱，佢音準好好，好得意。」身為媽媽仲對歌詞特別感觸：「好怕豆豆長大會離開自己身邊，我成日都諗起呢樣嘢。如果有機會，豆豆又真係好鍾意唱歌嘅話，都想同佢合唱，我覺得會幾得意，不過而家太細啦，等佢大啲再睇吓。」
阿正同豆豆亦都係專輯內容嘅重要構成部份

歌曲當然亦有同老公阿正嘅甜蜜回憶，Sherine笑謂老公經常鼓勵她要收錄《A Foggy Day》呢首歌：「因為我係馬來西亞人，香港對我嚟講係外國地方。初初嚟嗰陣，所有嘢對我都係好有新鮮感，但係喺呢個地方耐咗，都會好掛住屋企，甚至乎有個寂寞嘅感覺，直到你遇到一個人，成件事就好Sweet，生命都有意義咗，《A Foggy Day》就係呢個氣氛。」
今次已經係Sherine推出嘅第3張專輯

Sherine希望繼續好好唱歌，同唔同樂手交流：「希望可以有多啲Live嘅演出啦，我留意到香港多咗年青人鍾意爵士音樂，有啲唔同嘅音樂會，又會有啲工作坊，都真係吸引多咗人去接觸，希望多啲人可以試吓聽就好啦。」