自駕德島丨黎諾懿爆郭珮文食肥膏提神 郭珮文嘆隱世溫泉急分享火辣泳衣

黎諾懿率領郭珮文（Juliana）同陳懿德主持全新旅遊節目《自駕德島》，將於11月2號同9號晚喺翡翠台播出。三位主持現身為節目宣傳，佢哋除咗喺節目上山下海，Juliana同德德仲會比堅尼上陣，攀山涉水玩激流兼浸溫泉。

黎諾懿率領郭珮文同陳懿德主持全新旅遊節目《自駕德島》。
德德話一直聽聞諾懿好識得照顧人，今次合作完全體驗到對方對新人同女仔嘅好。節目未播出街，德德經已急不及待喺社交平台分享火辣泳衣相，仲叫大家要留意佢同Juliana一齊浸隱世溫泉，原來諾懿完全唔知道兩位拍擋浸溫泉，因為當時兩位靚女喺山下拍攝，而佢就上咗山上取景，所以錯失咗大飽眼福良機，諾懿仲講笑追問邊個下命令唔畀佢知。

德德經已急不及待喺社交平台分享火辣泳衣相。
拍攝旅遊節目又點會少得美食，諾懿大爆原來Juliana好擦得，仲好鍾意食肥膏。德德就話其他人係飲咖啡提神，而Juliana就係食肥膏提神。

Juliana同德德仲會比堅尼上陣，攀山涉水玩激流兼浸溫泉。