胡蓓蔚返上海陪父親慶祝生日 讚父母係白頭偕老典範

豹嫂胡蓓蔚同老公單立文係圈中模範夫妻，莫非呢種恩愛幸福係有遺傳基因。孝順女豹嫂喺社交平台分享咗返上海屋企為爸爸慶祝生日片段，準備一系列行程畀父母！

豹嫂胡蓓蔚同老公單立文不時返上海陪佢哋！
胡蓓蔚喺帖文寫上「祝老爸生日快樂！福如東海！壽比南山！同媽咪一齊健康開心快樂每一天」，仲寫上一句好多人認同嘅說話「長輩健康是我們的福氣」。

豹嫂近日返上海陪伴父母，帶住父母去飲茶嘆廣東點心。
咁究竟點解話恩愛係有遺傳基因，睇吓豹嫂分享短片就知，佢帶住父母去飲茶嘆廣東點心，期間不時捕捉八十幾歲嘅爸爸為媽咪影相打卡留倩影，十足十年輕情侶咁，又喺窗前攬住腰欣賞上海地標美景，豹嫂都忍唔住寫上「哇，白頭偕老最佳典範」，之後一家三口又嘆咖啡、食雪糕同大閘蟹。

八十幾歲嘅爸爸為媽咪影相打卡留倩影。
最重要環節就係胡媽媽為老公同乖女準備兩個蛋糕慶祝生日，切完蛋糕後，挑皮胡爸爸仲偷舔刀上蛋糕，幸福滿瀉。睇完成條短片，就會認同豹嫂嘅幸福婚姻係遺傳自父母嘅基因，因為懂得喺長久嘅婚姻路上欣賞對方同珍惜相處時刻。

兩老又喺窗前攬住腰欣賞上海地標美景。

胡媽媽為老公同乖女準備兩個蛋糕慶祝生日。