StarTalk一氣呵成版｜區瑞強夥弟妹出動辦慈善騷 好友力撐隨時兒孫同台

樂壇音樂世家唔少，而最近就有區氏決定舉家上陣喇，有「民歌王子」之稱嘅 區瑞強 同 最近參加《中年好聲音3》嘅 區瑞明 仲有妹妹 區桂芬 就即將會以兄妹檔聯手開騷，呢日佢哋接受 詹可琳 《StarTalk》專訪，Albert仲話屆時隨時區家三代人強馬狀齊齊上台為大家合唱呀。

雖然Albert已經入行數十載，不過今次都係第一次同細佬妹一齊合作演唱，佢指今次演出主題係「親」字，順理成章邀請弟妹上台就最合適不過喇。除咗佢哋之外，一班老友好似 胡楓 吳大強 韋綺姍 等等到時都會帶埋一眾親友現身。
區瑞強嘅慈善音樂會將有弟妹同好友齊齊上陣

咪睇Albert多年來一直唱未停過，其實妹妹亦早於80年代初已經參加唔同歌唱比賽，而Alvin同樣唱歌多年，就連佢哋嘅子女都一樣繼承愛唱歌嘅傳統，非常犀利。

幕前唱足半世紀嘅Albert，又講起當年參賽同喺《歡樂今宵》嘅演出，佢仲話早喺年幼時已跟隨哥哥興趣自學彈結他同唱歌至今，桂芬一樣自彈自唱，更係當年冠軍人馬，一首《問》仲令佢街知道巷聞。
區瑞明同區桂芬都一樣係唱得之人

今次演出為慈善之餘，亦向各大NGO提供平價門票，Albert指近年社會氣氛低下，希望以音樂同歌聲為大家洗滌心靈，仲係靠一班善心好友贊助促成呢次美事。
至於Alvin愛唱，仲令囡囡幫佢報名參加《中聲3》，一直保持低調未有通知家人嘅佢，去到海選一現身就因為網上直播被認出。佢又話一切緣於同囡囡合唱之後將歌曲放上網，大受好評令自己增加唔少信心，之後先直接報名參與。
Alvin早前未有通知Albert同家人參加《中聲3》

被朋友問起先知細佬參賽嘅Albert，亦都非常鼓勵佢參與，而Alvin就話比賽體驗非常開心，經驗更加係難能可貴喇。事後翻睇當時海選影片嘅Albert，就連評語都非常相似，仲話自己如果有份在席評審，都會比細佬入圍咁話。