洪金寶出席東京電影節讚甄子丹身手 望香港電影再創奇跡重現昔日輝煌

今屆東京國際電影節邀請到香港著名動作巨星「大哥大」洪金寶出席大師班活動，大會放映大哥大嘅舊作《特工爺爺》之後，亦安排咗一場同電影迷對談嘅環節，大哥大一身唐裝撐住拐杖現身，一出場大家報以熱烈嘅掌聲致敬，大哥大以簡單日文同日本影迷打招呼，感謝影迷一路支持，如果日後再推出新作，希望大家多多支持，仲講笑話睇足20次就夠。
洪金寶受東京國際電影節邀請，出席大師班活動。
呢場對談入面，從大哥大兒時七小福年代，到同傳奇動作巨星李小龍合作，甚至闖荷李活拍劇嘅階段，大家可以話對大哥大每個經歷相當有興趣，細細過就入電影圈嘅大哥大坦言視胡金銓導演為恩師，胡導對佢嘅影響亦相當之大—；喺《葉問2》大哥大同有宇宙最强之稱嘅甄子丹嘅對手，成為近年經典動作場口之一，坦言呢場戲打得好似好勁，但拍起來相當快手，大哥大讚後輩嘅身手好之外，自己一樣咁好，可以話係高手過招。 
大哥大表示自己永不言休。
年屆72歲嘅大哥大行動力大不如前，但大哥大話依然永不言休，希望有新品帶畀大家，而對於如果新嘅AI科技可以唔使動作演員打得咁辛苦，佢都話無任歡迎，仲呼籲全球影迷支持香港電影，希望香港電影再創奇跡，重現昔日輝煌。